ગાંધીનગર કલેક્ટરના માર્ગદર્શન હેઠળ ‘રાઉન્ડ ધ ક્લોક’ ડ્રાઈવમાં સાદી રેતીનું ગેરકાયદે વહન કરતા ૧૦ ડમ્પરો ઝડપાયા
ગાંધીનગર જિલ્લામાં બિનઅધિકૃત ખનીજ ખનન, વહન અને સંગ્રહ પ્રવૃત્તિઓ પર અંકુશ લાવવા માટે તંત્ર દ્વારા કડક ઝુંબેશ શરૂ કરવામાં આવી છે. ગાંધીનગર જિલ્લા કલેક્ટર શ્રી રવીન્દ્ર ખતાલેના સીધા માર્ગદર્શન હેઠળ અને મદદનીશ ભૂસ્તરશાસ્ત્રી શ્રી પ્રણવ સિંહની સૂચના અન્વયે મદદનીશ ભૂસ્તરશાસ્ત્રીની કચેરી, ભૂસ્તર વિજ્ઞાન અને ખનિજ ખાતાની ક્ષેત્રીય ટીમ દ્વારા ગત તા.૨૯/૦૫/૨૦૨૬ ના રોજ એક વિશેષ ‘રાઉન્ડ ધ ક્લોક સ્પેશ્યલ ડ્રાઈવ’ યોજવામાં આવી હતી. આ કામગીરી દરમિયાન સાદી રેતી ખનીજનું બિનઅધિકૃત વહન કરતા કુલ ૧૦ ડમ્પર વાહનો ઝડપી પાડી આશરે રૂપિયા ૦૩ કરોડનો મુદ્દામાલ જપ્ત કરવામાં આવ્યો છે.
ઉલ્લેખનીય છે કે,ઝડપાયેલા વાહનોમાં ૦૫ ડમ્પરો તદ્દન રોયલ્ટી પાસ વગર ગેરકાયદેસર અને અન્ય ૦૫ ડમ્પરો રોયલ્ટી પાસની મર્યાદા કરતા વધુ ઓવરલોડ ખનીજ ભરીને વહન કરતા પકડાયા હતા. જિલ્લાના ભાટ, ઘણપ, સરગાસણ, અડાલજ, લીમ્બડીયા, લવારપુર, ખોડીયાર-વૈષ્ણોદેવી તથા ખડાત ખાતેથી આ તમામ વાહનો પકડવામાં આવ્યા છે.
ભૂસ્તર તંત્રની વિગતો મુજબ, સાદી રેતી ભરી બિનઅધિકૃત રોયલ્ટી પાસ વગર વહન કરતા ૦૫ ડમ્પર વાહનો ઝડપાયા છે, જેમાં મોજે ભાટ-નાના ચિલોડા રોડ પાસેથી વાહન ડમ્પર GJ-24-V-8714 ના, લીમ્બડીયા ગામ પાસેથી વાહન ડમ્પર નં. GJ-24-X-4209, લવારપુર-વલાદ રોડ પાસેથી વાહન ડમ્પર નં. GJ-12-BV-1313, વૈષ્ણોદેવી સર્કલ રોડ પાસેથી વાહન ડમ્પર નં. GJ-24-X-4997, અને ખડાત-મહુડી રોડ પાસેથી વાહન ડમ્પર નં. GJ-17-XX-9423 સામેલ છે.
આ ઉપરાંત સાદી રેતી ખનીજ ભરી બિનઅધિકૃત રોયલ્ટી પાસ કરતા વધુ ઓવરલોડ વહન કરતા અન્ય ૦૫ ડમ્પર વાહનો ઝડપાયા છે, જેમાં ધણપ ચેકપોસ્ટ ખાતેથી વાહન ડમ્પર નં. GJ-01-KT-6725, સરગાસણ સર્કલ પાસેથી વાહન ડમ્પર નં. GJ-18-BV-4787, અડાલજ-ઝુંડાલ રોડ પરથી વાહન ડમ્પર નં. GJ-36-T-9569, વાવોલ પાસેના લીલા હોટલ રોડ પરથી વાહન ડમ્પર નં. GJ-02-BT-5171 અને ખોડીયાર–વૈષ્ણોદેવી રોડ પરથી વાહન ડમ્પર નં. GJ-24-X-6774 નો સમાવેશ થાય છે.
ભૂસ્તર વિભાગની ટીમ દ્વારા જપ્ત કરવામાં આવેલા આ તમામ ૧૦ વાહનોના માલિકો વિરૂદ્ધ ‘ગુજરાત મિનરલ (પ્રિવેન્શન ઓફ ઇલ્લીગલ માઇનીંગ, ટ્રાન્સપોર્ટેશન અને સ્ટોરેજ) નિયમો-૨૦૧૭’ ના કડક નિયમો હેઠળ આગળની દંડકીય કાર્યવાહી હાથ ધરવામાં આવશે. કલેક્ટર શ્રી રવીન્દ્ર ખતાલેના નેતૃત્વમાં ભૂસ્તરતંત્રની આ કડક અને સરાહનીય કામગીરીથી જિલ્લામાં ગેરકાયદેસર ખનીજ માફિયાઓ અને નિયમોનું ઉલ્લંઘન કરનારા તત્વોમાં ભારે ફફડાટ વ્યાપી ગયો છે. આગામી દિવસોમાં પણ આ પ્રકારની આકસ્મિક ચેકિંગ ડ્રાઈવ સતત ચાલુ રાખવામાં આવશે તેમ તંત્ર દ્વારા જણાવવામાં આવ્યું છે.
