ગાંધીનગર જિલ્લામાં કલેક્ટર રવિન્દ્ર ખતાલેના માર્ગદર્શન હેઠળ પ્રિ-મોનસૂન કામગીરીનો ધમધમાટ શરૂ
આગામી ચોમાસાની ઋતુને ધ્યાનમાં રાખીને ગાંધીનગર જિલ્લા વહીવટી તંત્ર દ્વારા નાગરિકોની સુખાકારી માટે આગોતરી તૈયારીઓ આરંભી દેવામાં આવી છે. ગાંધીનગર જિલ્લાના કલેક્ટર શ્રી રવિન્દ્ર ખતાલેના સીધા માર્ગદર્શન હેઠળ જિલ્લાના વિવિધ વિસ્તારોમાં પ્રિ-મોનસૂન કામગીરીનો વ્યાપક ધોરણે પ્રારંભ કરવામાં આવ્યો છે. આ કામગીરી અન્વયે જિલ્લાના વિવિધ વિસ્તારોમાં જળસંચય અને જળનિકાલ વ્યવસ્થાને સુદૃઢ કરવા પર વિશેષ ભાર મૂકવામાં આવ્યો છે. જે અંતર્ગત વરસાદી પાણીના સરળ નિકાલ માટે કાંસમાં જામેલો કચરો અને ઝાડી-ઝાંખરા દૂર કરવા, શહેરી અને ગ્રામ્ય વિસ્તારોમાં પાણી ભરાવાની સમસ્યા ન સર્જાય તે માટે સ્ટોર્મ વોટર લાઇનની સઘન સફાઈ કરવી, તેમજ વરસાદી પાણીના સંગ્રહ માટે તળાવોની સાફસફાઈની સાથે સાથે તેને ઊંડા કરવાની કામગીરી યુદ્ધના ધોરણે હાથ ધરવામાં આવી રહી છે.તથા વન વિભાગ દ્વારા વરસાદી વાતાવરણ અને પવનને કારણે જોખમ બની શકે તેવા વૃક્ષોના ટ્રીમિંગની કામગીરી પણ હાથ ધરવામાં આવી છે
ઉલ્લેખનીય છે કે, કલેકટર શ્રી ગાંધીનગર રવિન્દ્ર ખતાલેના દિશાનિર્દેશ હેઠળ જિલ્લા વહીવટી તંત્ર દ્વારા આ સઘન ઝુંબેશ હાથ ધરવા પાછળનો મુખ્ય ઉદ્દેશ્ય એ છે કે, આગામી ચોમાસા દરમિયાન ભારે વરસાદની સ્થિતિમાં પણ નગરજનોને ઓછામાં ઓછી અથવા નહિવત તકલીફનો સામનો કરવો પડે. પાણી ભરાવાની કે અન્ય હાલાકીથી લોકોને બચાવી શકાય તે માટે આ તમામ કામગીરી ચોમાસા પૂર્વે જ પૂર્ણ કરી લેવાનું આયોજન કરવામાં આવ્યું છે. ગાંધીનગર જિલ્લા વહીવટી તંત્ર નાગરિકોની સુરક્ષા અને સુવિધા માટે સક્રિયપણે કાર્યરત છે અને આ પ્રિ-મોનસૂન કામગીરીને સમયસર પૂર્ણ કરવા તમામ સંબંધિત વિભાગોને જરૂરી સૂચનાઓ આપી દેવામાં આવી છે.
