‘સ્માર્ટ સિટી’ના દાવા વચ્ચે કુડાસણમાં કાટમાળનું સામ્રાજ્ય, તંત્ર ઘોર નિંદ્રામાં
ગાંધીનગરના કુડાસણ વિસ્તારમાં આવેલ અર્બનિયા બિલ્ડિંગની પાછળ જાહેર રોડ ઉપર બિલ્ડિંગ તોડફોડમાંથી નીકળેલો કાટમાળ અને બાંધકામનો કચરો ગેરકાયદેસર રીતે ઠાલવી દેવામાં આવ્યો હોવાની ઘટના સામે આવી છે. અજાણ્યા શખ્સો દ્વારા રોડની બાજુએ મોટા પ્રમાણમાં કચરાના ઢગલા ઉભા કરી દેવામાં આવતા સ્થાનિક રહેવાસીઓમાં ભારે રોષ ફેલાયો છે.
સ્થળ પર પડેલા કોંક્રીટના ટુકડા, ઈંટો, મલબો અને અન્ય બાંધકામનો કચરો સ્પષ્ટ દર્શાવે છે કે જાહેર સ્થળને ડમ્પિંગ યાર્ડ બનાવી દેવામાં આવ્યું છે. આ કચરાના ઢગલાઓના કારણે વાહનચાલકો અને રાહદારીઓને મુશ્કેલીનો સામનો કરવો પડી રહ્યો છે, સાથે જ પર્યાવરણ અને સ્વચ્છતા પર પણ ગંભીર અસર પડી રહી છે.
સ્થાનિકોનો આક્ષેપ છે કે મહાનગરપાલિકાના જવાબદાર વિભાગોની ઘોર બેદરકારીના કારણે આવા તત્વોને ખુલ્લો છૂટો દોર મળ્યો છે. જાહેર રોડ પર આટલા મોટા પ્રમાણમાં કચરો ઠાલવવામાં આવ્યો હોવા છતાં તંત્ર દ્વારા કોઈ કાર્યવાહી કરવામાં આવી નથી, જે અનેક પ્રશ્નો ઉભા કરે છે.
સ્થાનિક નાગરિકોએ માંગ કરી છે કે કચરો ઠાલવનાર જવાબદાર વ્યક્તિઓ અથવા એજન્સીઓની તાત્કાલિક ઓળખ કરી તેમની સામે કડક દંડાત્મક કાર્યવાહી કરવામાં આવે તેમજ સમગ્ર કચરો તાત્કાલિક દૂર કરવામાં આવે. જો સમયસર પગલાં નહીં ભરાય તો આ વિસ્તાર ગેરકાયદેસર ડમ્પિંગ ઝોનમાં ફેરવાઈ જવાની ભીતિ વ્યક્ત કરવામાં આવી રહી છે.
