ચોમાસાની પૂર્વતૈયારી: ગાંધીનગર મહાનગરપાલિકા દ્વારા શહેરના જોખમી અને અનધિકૃત હોર્ડિંગ્સ દૂર કરવાની ઝુંબેશ શરૂ

તા. ૧૦ જૂન, ૨૦૨૬, ગાંધીનગર,

ગાંધીનગર મહાનગરપાલિકા દ્વારા આગામી ચોમાસાની ઋતુને ધ્યાને રાખીને નાગરિકોની સુરક્ષા અને સુવિધાના ભાગરૂપે સમગ્ર મહાનગરપાલિકા વિસ્તારમાં આવેલા જોખમી તેમજ અનધિકૃત હોર્ડિંગ્સ અને બેનર્સના સ્ટ્રક્ચર દૂર કરવાની પુન: સઘન રીતે ઝુંબેશ શરૂ કરવામાં આવી છે. સંભવિત ભારે વરસાદ દરમિયાન આ પ્રકારના જોખમી સ્ટ્રક્ચર ધરાશાયી થવાથી મોટી જાનહાનિ કે અકસ્માત સર્જાવાની સંભાવના રહે છે, આ પ્રકારની કોઈ પણ ઘટના ન સર્જાય તે માટે ગાંધીનગર મહાનગરપાલિકા દ્વારા આગમચેતીના પગલાં રૂપે આ નકકર કામગીરી હાથ ધરવામાં આવી છે.

આ સઘન ઝુંબેશ અંતર્ગત મહાનગરપાલિકાની ટીમ દ્વારા અત્યાર સુધીમાં શહેરના વિવિધ મુખ્ય માર્ગો અને વિસ્તારોમાંથી ૩ જેટલા મોટા અને જોખમી લોખંડના સ્ટ્રક્ચર તેમજ અંદાજે ૧૦૦ જેટલા નાના-મોટા ટેમ્પરરી હોર્ડિંગ્સ અને બેનર્સને સફળતાપૂર્વક દૂર કરી દેવામાં આવ્યા છે. ગાંધીનગર મહાનગરપાલિકા દ્વારા સરકારી જમીન કે મિલકત પર ગેરકાયદેસર રીતે ઊભા કરવામાં આવેલા તમામ હોર્ડિંગ્સને હટાવીને જાહેર માર્ગો ખુલ્લા કરવામાં આવી રહ્યા છે.

આ સાથે જ ખાનગી માલિકીની જગ્યાઓ, રહેણાંક સોસાયટીઓ કે કોમર્શિયલ કૉમ્પ્લેક્સમાં નિયમ વિરૂદ્ધ લગાવવામાં આવેલા અથવા તો મહાનગરપાલિકાની કાયદેસરની મંજૂરી મેળવ્યા વિના ઊભા કરાયેલા હોર્ડિંગ્સ સામે પણ કડક કાયદાકીય કાર્યવાહી શરૂ કરવામાં આવી છે. આગામી દિવસોમાં આ કામગીરી વધુ વેગવંતી બનાવવામાં આવશે જેથી ચોમાસા દરમિયાન પવન અને વરસાદના કારણે નાગરિકો પર કોઈ સંકટ ન આવે.