ગાંધીનગરની કરોડોની સરકારી દુકાનો હવે મહાનગરપાલિકાના હવાલે, રાજ્ય સરકારે લીધો મોટો નિર્ણય

ઘ-5 ફૂડકોર્ટ, મીના બજાર, શોપિંગ સેન્ટરો સહિતની વિવિધ દુકાનોનું સંચાલન હવે ગાંધીનગર મહાનગરપાલિકા કરશે

ગાંધીનગરમાં આવેલ વિવિધ પ્રકારની સરકારી દુકાનો, ઘ-5 ફૂડકોર્ટ, મીના બજારની દુકાનો, સેક્ટર-21 શોપિંગ સેન્ટર સહિતની તમામ દુકાનોનું સંચાલન અને તબદીલી કરવાની સત્તા હવે ગાંધીનગર મહાનગરપાલિકાને સોંપવામાં આવી છે. માર્ગ અને મકાન વિભાગ દ્વારા 3 જૂન, 2026ના રોજ આ અંગે મહત્વપૂર્ણ આદેશ બહાર પાડવામાં આવ્યો છે.

સરકારી આદેશ મુજબ ગાંધીનગરમાં આવેલી વિવિધ દુકાનોના ભાડા વસૂલાત, ભાડે ફાળવણી, કરારની શરતોનું પાલન અને અન્ય વહીવટી કામગીરી હવે ગાંધીનગર મહાનગરપાલિકા દ્વારા હાથ ધરવામાં આવશે. અત્યાર સુધી આ દુકાનોનું સંચાલન માર્ગ અને મકાન વિભાગના નિયંત્રણ હેઠળ હતું. આ નિર્ણયથી દુકાનો સંબંધિત વહીવટી પ્રક્રિયાઓ વધુ સરળ અને સ્થાનિક સ્તરે ઝડપી બનશે તેવી અપેક્ષા વ્યક્ત કરવામાં આવી રહી છે. સાથે જ દુકાનદારોને વિવિધ કામો માટે હવે સીધા મહાનગરપાલિકાનો સંપર્ક કરવો પડશે.
સરકારે સ્પષ્ટ કર્યું છે કે હાલના ભાડા કરારો અને અન્ય નિયમો યથાવત રહેશે, જ્યારે ભવિષ્યમાં ભાડા વધારા અથવા નવી ફાળવણી અંગેના નિર્ણયો ગાંધીનગર મહાનગરપાલિકા દ્વારા નિયમો અનુસાર લેવામાં આવશે.