વિશ્વ રક્તદાતા દિવસ નિમિત્તે ગાંધીનગરની ‘ધ લીલા’ હોટેલ ખાતે રક્તદાન કેમ્પ યોજાયો, ૩૬ યુનિટ રક્ત એકત્રિત કરાયું

૧૪મી જૂન એટલે કે ‘વિશ્વ રક્તદાતા દિવસ’ની ઉજવણીના ભાગરૂપે ઇન્ડિયન રેડ ક્રોસ સોસાયટી, ગાંધીનગર જિલ્લા શાખા દ્વારા ગાંધીનગરની પ્રતિષ્ઠિત હોટેલ ‘ધ લીલા’ ખાતે એક વિશેષ અને ભવ્ય રક્તદાન કેમ્પનું આયોજન કરવામાં આવ્યું હતું. માનવતા અને સામાજિક ઉત્તરદાયિત્વના આ પવિત્ર કાર્યમાં હોટેલના સ્ટાફ અને મેનેજમેન્ટે ખૂબ જ ઉત્સાહભેર ભાગ લીધો હતો. આ રક્તદાન કેમ્પ દરમિયાન જાગૃત નાગરિકો અને સેવાભાવી રક્તદાતાઓના સક્રિય સહયોગથી કુલ ૩૬ યુનિટ રક્ત એકત્રિત કરવામાં આવ્યું હતું. રેડ ક્રોસ સોસાયટીના જણાવ્યા અનુસાર, એકત્રિત થયેલું આ રક્ત હોસ્પિટલોમાં દાખલ જરૂરિયાતમંદ દર્દીઓ, પ્રસુતિ સમયની મહિલાઓ તેમજ ખાસ કરીને કેન્સર અને થેલેસેમિયા જેવી ગંભીર બીમારીઓથી પીડિત બાળકોની સારવાર માટે આશીર્વાદરૂપ અને સંજીવની સમાન સાબિત થશે. આ પ્રસંગે ઇન્ડિયન રેડ ક્રોસ સોસાયટી, ગાંધીનગર જિલ્લા શાખાના સેક્રેટરી શ્રી કે.ટી. પટેલે જણાવ્યું હતું કે, “રક્તદાન એ જ મહાદાન છે અને તે અન્ય વ્યક્તિને નવજીવન આપવાનું શ્રેષ્ઠ માધ્યમ છે. ‘ધ લીલા’ હોટેલના મેનેજમેન્ટ અને તમામ રક્તદાતાઓનો આ ઉમદા સહકાર સમાજ માટે પ્રેરણારૂપ છે. આ પ્રકારના આયોજનોથી સમાજમાં રક્તદાન પ્રત્યે જાગૃતિ વધશે.” કાર્યક્રમના અંતે રેડ ક્રોસ સોસાયટી દ્વારા રક્તદાન કરનાર તમામ સેવાભાવી નાગરિકો અને હોટેલ સ્ટાફનો હૃદયપૂર્વક આભાર વ્યક્ત કરવામાં આવ્યો હતો અને તમામ રક્તદાતાઓને પ્રશંસાપત્ર આપી સન્માનિત કરવામાં આવ્યા હતા.