ગાંધીનગરમાં ૧૭ જૂને મહિલાઓ માટે ખાસ રોજગાર ભરતીમેળો યોજાશે

ગાંધીનગર જિલ્લાની રોજગારવાંચ્છુ મહિલા ઉમેદવારોના લાભાર્થે જિલ્લા રોજગાર વિનિમય કચેરી, ગાંધીનગર દ્વારા આગામી તા.૧૭/૦૬/૨૦૨૬ના રોજ સવારે ૧૦:૦૦ કલાકે બાપુ કોલેજ, ગાંધીનગર-માણસા રોડ, વાસન, ગાંધીનગર ખાતે એક વિશેષ ‘મહિલા રોજગાર ભરતીમેળો’ યોજાશે. આ રોજગાર ભરતીમેળામાં વિવિધ ખાનગી ક્ષેત્રના પ્રતિષ્ઠિત નોકરીદાતાઓ દ્વારા ઉપસ્થિત રહીને કુશળ મહિલા ઉમેદવારોની સ્થળ પર જ પ્રાથમિક પસંદગી કરવામાં આવશે. આ મેળામાં ૧૮ થી ૪૦ વર્ષની ઉંમર ધરાવતા અને ધોરણ-૧૦ પાસ, ધોરણ-૧૨ પાસ, ડિપ્લોમા, આઈ.ટી.આઈ તથા કોઈપણ વિદ્યાશાખાની સ્નાતક કક્ષાની શૈક્ષણિક લાયકાત ધરાવતા શારીરિક રીતે સશક્ત મહિલા ઉમેદવારો ભાગ લઇ શકશે. ઇચ્છુક મહિલા ઉમેદવારોએ રાજ્ય સરકારના અનુબંધમ પોર્ટલ anubandham.gujarat.gov.in ઉપર રજીસ્ટ્રેશન કરવાનું રહેશે, જેનો જોબફેર આઇ.ડી. JF752913533 છે. ભરતીમેળામાં ભાગ લેવા માટે ઉમેદવારોએ પોતાના અસલ શૈક્ષણિક પ્રમાણપત્રો, તેની ઝેરોક્ષ નકલો અને બાયોડેટા સાથે સ્વખર્ચે નિયત સ્થળે હાજર રહેવાનું રહેશે. આ ભરતીમેળામાં રોજગાર કચેરીમાં નામ નોંધણી કરાવેલ હોય કે ન કરાવેલ હોય તેવા માત્ર ગાંધીનગર જિલ્લાના જ રોજગારવાંચ્છુ મહિલા ઉમેદવારો ભાગ લઇ શકશે, તેમ જિલ્લા રોજગાર અધિકારીશ્રી, ગાંધીનગર દ્વારા જણાવાયું છે.