ગાંધીનગર સહિત સમગ્ર ગુજરાતમાં મેઘરાજાની ધમાકેદાર એન્ટ્રી, ગરમીથી જનતાને રાહત

ગાંધીનગર : છેલ્લા ઘણા દિવસોથી અસહ્ય ગરમી અને ઉકળાટનો સામનો કરી રહેલા ગુજરાતવાસીઓ માટે રાહતના સમાચાર સામે આવ્યા છે. રાજ્યના વિવિધ વિસ્તારોમાં પ્રિ-મોન્સૂન એક્ટિવિટી સક્રિય બનતા વરસાદી માહોલ જામ્યો છે. ભારે પવન અને વરસાદી ઝાપટાંને કારણે તાપમાનમાં ઘટાડો નોંધાયો છે અને વાતાવરણમાં ઠંડક પ્રસરી ગઈ છે.
રાજ્યના પાટનગર ગાંધીનગરમાં આજે ધીમી ધારે વરસાદ વરસી રહ્યો છે. વાદળછાયું વાતાવરણ અને ઠંડા પવનોને કારણે લોકોને કાળઝાળ ગરમીમાંથી મોટી રાહત મળી છે. છેલ્લા કેટલાક દિવસોથી 40 ડિગ્રીની આસપાસ પહોંચતા તાપમાનથી પરેશાન નાગરિકો હવે વરસાદી માહોલનો આનંદ માણી રહ્યા છે. હવામાન વિભાગના અનુમાન મુજબ ઉત્તર ગુજરાત, મધ્ય ગુજરાત અને દક્ષિણ ગુજરાતના અનેક જિલ્લાઓમાં હળવાથી મધ્યમ વરસાદ તેમજ ગાજવીજ સાથે પવન ફૂંકાવાની શક્યતા છે. ગાંધીનગર, અમદાવાદ, મહેસાણા, સાબરકાંઠા સહિતના વિસ્તારોમાં આગામી દિવસોમાં પણ વરસાદી પ્રવૃત્તિ યથાવત રહેવાની આગાહી કરવામાં આવી છે.
ખેડૂતોમાં પણ ખુશીનો માહોલ જોવા મળી રહ્યો છે. વરસાદની શરૂઆતથી ખરીફ પાકની તૈયારીને વેગ મળશે તેવી આશા વ્યક્ત કરવામાં આવી રહી છે. બીજી તરફ શહેરોમાં ગરમીના કારણે સુમસામ બનેલા માર્ગો પર વરસાદ પડતા લોકોમાં નવી તાજગી જોવા મળી છે. ગુજરાતમાં મેઘરાજાની એન્ટ્રી સાથે હવે ચોમાસાની આતુરતાપૂર્વક રાહ જોતા લોકોમાં આનંદની લાગણી પ્રસરી ગઈ છે. આગામી દિવસોમાં વરસાદનું જોર વધે તેવી શક્યતાઓ વચ્ચે રાજ્યભરમાં ઠંડકભર્યું વાતાવરણ સર્જાયું છે.