ગાંધીનગર જિલ્લા ન્યાયાલય પરિસરમાં ‘આંતરરાષ્ટ્રીય યોગ દિવસ’ની ઉત્સાહભેર ઉજવણી
ગુજરાત હાઈકોર્ટના માર્ગદર્શન અને સૂચનાઓ અનુસાર તા. ૨૧ જૂન, ૨૦૨૬ના રોજ જિલ્લા ન્યાયાલય, ગાંધીનગરના પરિસરમાં ‘આંતરરાષ્ટ્રીય યોગ દિવસ-૨૦૨૬’ ની ઉત્સાહભેર ઉજવણી કરવામાં આવી હતી. આ પ્રસંગે જિલ્લા ન્યાયાલય, ગાંધીનગરના પ્રિન્સિપલ ડિસ્ટ્રિક્ટ જજ શ્રી આશિષ જે. એસ. મલ્હોત્રા તથા ફેમિલી કોર્ટ, ગાંધીનગરના પ્રિન્સિપલ જજ શ્રીમતી આરતી દેસાઈની ગરિમામય ઉપસ્થિતિમાં વિશેષ યોગ સત્રનું આયોજન કરવામાં આવ્યું હતું. આ તકે ઉપસ્થિત સૌને યોગના માધ્યમથી શારીરિક, માનસિક અને આધ્યાત્મિક સ્વાસ્થ્યના મહત્ત્વ અંગે માહિતગાર કરવામાં આવ્યા હતા.
આ કાર્યક્રમમાં ન્યાયતંત્રના ન્યાયિક અધિકારીશ્રીઓ, જિલ્લા સરકારી વકીલશ્રી, અન્ય સરકારી વકીલશ્રીઓ, ગાંધીનગર બાર એસોસિએશન તેમજ ગાંધીનગર ડિસ્ટ્રિક્ટ બાર એસોસિએશનના પ્રમુખશ્રીઓ અને મહામંત્રીશ્રી સહિત અદાલતના કર્મચારીઓ મોટી સંખ્યામાં ઉપસ્થિત રહ્યા હતા. કાર્યક્રમ દરમિયાન સૌએ સામૂહિક રીતે વિવિધ યોગાસનો અને પ્રાણાયામ કરી, દૈનિક જીવનમાં યોગને અપનાવી સ્વસ્થ અને સંતુલિત જીવન જીવવાનો સંકલ્પ ઉપસ્થિત સૌ દ્વારા લેવામાં આવ્યો હતો. જિલ્લા ન્યાયાલય, ગાંધીનગર દ્વારા આયોજિત આ કાર્યક્રમ સૌના સહયોગ અને ઉત્સાહપૂર્ણ સહભાગીદારીને કારણે સફળતાપૂર્વક સંપન્ન થયો હતો.
