કલોલમાં ઓવરબ્રીજની કામગીરીને પગલે ટ્રાફિક ડાયવર્ઝન જાહેર,કલોલ રેલ્વે સ્ટેશન નજીક ભારે વાહનો પર પ્રતિબંધ સાથે વૈકલ્પિક રૂટ જાહેર કરાયો
કલોલ રેલ્વે સ્ટેશન નજીક આવેલ લેવલ ક્રોસીંગ નંબર ૨૩૨ બી.વી.એમ. ફાટક પર રેલ્વે ટ્રેક ઓવરબ્રીજ બનાવવાની કામગીરી તેમજ ડ્રેનેજ ગટર લાઇનનું કામકાજ પ્રગતિમાં હોઈ, કાયદો અને વ્યવસ્થાની પરિસ્થિતિ જળવાઈ રહે અને ટ્રાફિકની સમસ્યા ન સર્જાય તે માટે ગાંધીનગરના અધિક જિલ્લા મેજિસ્ટ્રેટ શ્રી વિપુલ ઠક્કર દ્વારા એક જાહેરનામું બહાર પાડી ટ્રાફિક ડાયવર્ઝન અમલમાં મૂકવામાં આવ્યું છે.
આ જાહેરનામા અનુસાર તા.૧૫/૦૭/૨૦૨૬થી તા.૩૦/૧૨/૨૦૨૬ સુધી પ્રતિબંધિત સાથે વૈકલ્પિક રૂટ અમલમાં રહેશે.
જે અંતર્ગત કલોલ રેલ્વે સ્ટેશન નજીક આવેલ લેવલ ક્રોસીંગ નં. ૨૩૨ બી.વી.એમ. ફાટક ખાતે ઓવરબ્રીજ અને ડ્રેનેજ ગટર લાઇનના કામકાજ સબબ આ જગ્યાએથી માત્ર ટુ-વ્હીલર જ પસાર થઈ શકશે અને અન્ય તમામ પ્રકારના ફોર-વ્હીલર કે ભારે વાહનો માટે પ્રવેશ પર સંપૂર્ણ પ્રતિબંધ રહેશે. આ સમયગાળા દરમિયાન વૈકલ્પિક માર્ગ તરીકે ટુ-વ્હીલર અને થ્રી-વ્હીલર વાહનો સ્ટેશન રોડથી રઘુવીર ચોકડી સુધીના રેલ્વે અંડરબ્રીજનો ઉપયોગ કરી શકશે, જ્યારે ફોર-વ્હીલર અને ભારે વાહનો માટે રેલ્વે ઓવરબ્રીજ (મટવાકુવા ઓવરબ્રીજ) નો ઉપયોગ કરવાનો રહેશે.
આ જાહેરનામાનો ભંગ કે ઉલ્લંઘન કરનાર વ્યક્તિ વિરુદ્ધ કાયદેસરની કાર્યવાહી કરવામાં આવશે. માટે તંત્ર દ્વારા તમામ વાહનચાલકોને આ સમયગાળા દરમિયાન વૈકલ્પિક માર્ગનો ઉપયોગ કરવા અને સહકાર આપવા વિનંતી કરવામાં આવી છે.
