ગાંધીનગરમાં સશસ્ત્ર દળોના ગણવેશ અને પ્રતીકોના બિનઅધિકૃત વેચાણ તેમજ ઉપયોગ પર જિલ્લા મેજીસ્ટ્રેટ દ્વારા પ્રતિબંધ જાહેર

ગાંધીનગર તા.૧૫ જુલાઈ –
તાજેતરમાં બનાસકાંઠા જિલ્લામાં સૈન્ય (બી.એસ.એફ.) નો ગણવેશ પહેરીને લશ્કરી વાહનની આડમાં ગેરકાયદેસર દારૂની હેરફેર કરવાનો બનાવ પ્રકાશમાં આવ્યો છે. ભૂતકાળમાં પઠાણકોટ, ઉરી અને જમ્મુ-કાશ્મીર ખાતે પણ આતંકવાદીઓ દ્વારા સૈન્યના ગણવેશ ધારણ કરી લશ્કરી છાવણીઓ અને એરફોર્સ સ્ટેશન પર હુમલા કરવામાં આવ્યા હતા. ગુજરાત રાજ્ય આંતરરાષ્ટ્રીય જળ સીમા અને સરહદ ધરાવતું હોવાથી રાષ્ટ્રીય સુરક્ષા માટે ગંભીર ખતરો ન ઉભો થાય તે હેતુથી ગાંધીનગરના ઇન્ચાર્જ જિલ્લા મેજીસ્ટ્રેટ શ્રી જે.એસ. પ્રજાપતિ દ્વારા ગાંધીનગર જિલ્લાના સમગ્ર મહેસૂલી વિસ્તારમાં સશસ્ત્ર દળોના ગણવેશ, પોશાક, ચિન્હો અને અન્ય સંબંધિત ચીજવસ્તુઓના બિનઅધિકૃત વેચાણ તેમજ ઉપયોગ પ્રતિબંધ ફરમાવવામાં આવ્યો છે.    આ હુકમ તા. ૧૨/૦૯/૨૦૨૬ સુધી સમગ્ર જિલ્લામાં અમલમાં રહેશે.આ જાહેરનામાના નિયમોનો ભંગ કરનાર વ્યક્તિ શિક્ષાત્મક કાર્યવાહીને‌ પાત્ર રહેશે.