ગાંધીનગર જિલ્લામાં નશીલા પદાર્થોના સેવન માટે વપરાતા ‘રોલિંગ પેપર’ અને ‘સ્મોકિંગ કોન’ ના સંગ્રહ, વેચાણ અને હેરફેર પર તાત્કાલિક અસરથી પ્રતિબંધ

ગાંધીનગર જિલ્લામાં સગીરો અને યુવાનો દ્વારા વિવિધ નશીલા પદાર્થો જેવા કે ચરસ અને ગાંજાના સેવન માટે ઉપયોગમાં લેવાતી સ્મોકિંગ એસેસરીઝ જેવી કે ‘રોલિંગ પેપર’ અને ‘સ્મોકિંગ કોન’ ના ગેરકાયદેસર ઉપયોગ, સંગ્રહ, વેચાણ અને હેરફેર પર ઇ.ચા જિલ્લા મેજિસ્ટ્રેટ શ્રી જે.એસ. પ્રજાપતિ દ્વારા તાત્કાલિક અસરથી પ્રતિબંધ ફરમાવતું જાહેરનામું બહાર પાડવામાં આવ્યું છે.
આ હુકમ તા.૧૫/૦૭/૨૦૨૬ થી ૧૨/૦૯/૨૦૨૬ સુધી સમગ્ર ગાંધીનગર જિલ્લાના મહેસૂલી વિસ્તાર તેમજ પશ્ચિમ રેલ્વે પોલીસ સ્ટેશનના હદ વિસ્તારમાં અમલી રહેશે.
રાજ્યના ફોરેન્સિક સાયન્સ નિયામક (FSL) ના સત્તાવાર અભિપ્રાય અનુસાર, વનસ્પતિજન્ય નાર્કોટિક પદાર્થોના ધુમ્રપાન માટે રોલિંગ પેપર આધારિત એસેસરીઝ ડ્રગ પેરાફર્નાલિયા તરીકે કામ કરે છે. તેના ઉપયોગથી નશીલા દ્રવ્યોનું શરીરમાં ખૂબ જ ઝડપી શોષણ થાય છે, જેના લીધે વ્યક્તિની ડ્રગ પર નિર્ભરતા વધે છે અને અચાનક વધુ માત્રામાં ડ્રગ્સ લેવાઈ જવાની ગંભીર સંભાવના રહેલી છે. વધુમાં, આ રોલિંગ પેપર બળવાથી ઉત્પન્ન થતા ઝેરી પદાર્થો જેવા કે ટાર, કાર્બન મોનોક્સાઇડ અને અન્ય ઉત્તેજકો માનવ ફેફસાં તેમજ હૃદય સંબંધિત કાર્ડિયોવેસ્ક્યુલર સિસ્ટમને ગંભીર નુકસાન પહોંચાડે છે.

વિવિધ સામાજિક સંગઠનો, પ્રતિનિધિઓ અને મીડિયા દ્વારા મળેલી રજૂઆતો તેમજ ગુપ્તચર સંસ્થાઓના અહેવાલો મુજબ, ગાંધીનગર જિલ્લાના રહેણાંક વિસ્તારો, પાન પાર્લરો, ચાની દુકાનો, કરિયાણાની દુકાનો તેમજ ઓનલાઇન ઇ-કોમર્સ પ્લેટફોર્મ્સ દ્વારા આવી સ્મોકિંગ એસેસરીઝ સરળતાથી ઉપલબ્ધ બનતી હોવાથી સગીરો અને યુવાપેઢીના શારીરિક-માનસિક સ્વાસ્થ્ય સામે ગંભીર ખતરો ઊભો થયો છે. આ વિષયની ગંભીરતાને ધ્યાનમાં રાખીને જિલ્લા મેજિસ્ટ્રેટ દ્વારા આ કડક આદેશો જાહેર કરવામાં આવ્યા છે.માટે આ જાહેરનામાના કોઈ પણ નિયમનો ભંગ કરનાર વ્યક્તિ વિરુદ્ધ ગુનો નોંધી કાયદેસરની કડક કાર્યવાહી હાથ ધરવામાં આવશે. જિલ્લા વહીવટી તંત્ર દ્વારા તમામ નાગરિકો અને ખાસ કરીને વેપારી વર્ગને આ નિયમોનું ચુસ્ત પાલન કરવા અને યુવાધનને નશાના દૂષણથી બચાવવા માટે સહયોગ આપવા અપીલ કરવામાં આવી છે.