સમગ્ર જિલ્લામાં ‘પોષણ સંગમ’ અંતર્ગત ICDS અને RBSK ટીમ દ્વારા બાળકોનું હેલ્થ સ્ક્રીનિંગ અને મેડિકલ ચેકઅપ યોજાયું

ગાંધીનગર
સમગ્ર જિલ્લામાં બાળકોના સ્વાસ્થ્ય અને પોષણના સ્તરમાં સુધારો લાવવાના ઉદ્દેશ્ય સાથે ‘પોષણ સંગમ’ કાર્યક્રમ અંતર્ગત એક વિશેષ ઝુંબેશ હાથ ધરવામાં આવી છે. આ અભિયાન અંતર્ગત આઈ.સી.ડી.એસ. (ICDS) અને હેલ્થ ડિપાર્ટમેન્ટની આર.બી.એસ.કે. (RBSK) ટીમ દ્વારા સંયુક્ત રીતે જિલ્લાના બાળકોનું સઘન સ્ક્રીનિંગ અને મેડિકલ ચેકઅપ કરવાની પ્રશંસનીય કામગીરી શરૂ કરવામાં આવી છે. આ ઝુંબેશના ભાગરૂપે જિલ્લા પંચાયત પ્રમુખશ્રી રાજેશભાઈ પટેલ તેમજ મહિલા અને બાળ વિકાસ સમિતિના ચેરમેનશ્રીની અધ્યક્ષતામાં રૂપાલ ગામે મેડિકલ કેમ્પનું આયોજન કરવામાં આવ્યું હતું. આ પ્રસંગે ઉપસ્થિત મહાનુભાવોએ આઈ.સી.ડી.એસ અને આરોગ્ય વિભાગના આ સંયુક્ત પ્રયાસને બિરદાવ્યો હતો અને જણાવ્યું હતું કે, બાળકો દેશનું ભવિષ્ય છે અને તેમને તંદુરસ્ત રાખવા માટે સરકાર કટિબદ્ધ છે. આ કેમ્પનો મોટી સંખ્યામાં ગ્રામજનો અને બાળકોએ લાભ લીધો હતો.
કેમ્પમાં ઉપસ્થિત રહેલા તમામ બાળકોના વજન અને લંબાઈની ચોક્કસ માપણી કરવામાં આવી હતી. RBSKની તબીબી ટીમ દ્વારા બાળકોની આરોગ્ય ચકાસણી કરી તેમના પોષણના સ્તરની ઝીણવટભરી તપાસ કરવામાં આવી હતી. કેમ્પ દરમિયાન જે બાળકો કુપોષિત અથવા અલ્પપોષિત જણાયા છે, તેમના સ્વાસ્થ્યમાં સુધારો લાવવા અને નિયમિત દેખરેખ રાખી બાળકોને કુપોષણમુક્ત કરવા માટે આગામી સતત ૫ દિવસ સુધી સઘન ફોલોઅપ કામગીરીનું વિશેષ આયોજન પણ કરવામાં આવ્યું છે.
આ ભગીરથ કાર્યના સફળ અમલીકરણ માટે ગાંધીનગર જિલ્લા વિકાસ અધિકારીશ્રી ડો. હસરત જાસ્મીનના સીધા માર્ગદર્શન હેઠળ આઈ.સી.ડી.એસ. અને આરોગ્ય વિભાગના અધિકારીઓ, સુપરવાઈઝર બહેનો, આંગણવાડી કાર્યકર-તેડાગર બહેનો તેમજ આર.બી.એસ.કે.ની ટીમ દ્વારા ગ્રામ્ય સ્તરે પ્રશંસનીય જહેમત ઉઠાવવામાં આવી રહી છે. ‘પોષણ સંગમ’ ના આ સઘન અને સંકલિત પ્રયાસો આગામી દિવસોમાં ગાંધીનગર જિલ્લાના બાળકોને સુપોષિત અને તંદુરસ્ત બનાવી ‘કુપોષણ મુક્ત ગાંધીનગર’ ના સંકલ્પને સાકાર કરવામાં મહત્વની ભૂમિકા ભજવશે.