ગાંધીનગર જિલ્લામાં ભારે વરસાદની આગાહીને પગલે તા.૨૪ જુલાઈના તમામ શાળાઓ, કોલેજો અને આંગણવાડીઓમાં રજા જાહેર કરાઈ

ગાંધીનગર તા.૨૩ જુલાઈ
ભારત હવામાન વિભાગ, અમદાવાદ દ્વારા જારી કરવામાં આવેલ હવામાનની આગાહી મુજબ ગાંધીનગર જિલ્લામાં મધ્યમથી ભારે વરસાદ, ગાજવીજ અને પવન સાથેના વાતાવરણની શક્યતા દર્શાવવામાં આવી છે.
નાગરિકોની સુરક્ષા અને વિદ્યાર્થીઓની સલામતીને ધ્યાનમાં રાખીને તંત્ર દ્વારા સાવચેતીના પગલારૂપે તા.૨૪ જુલાઈના રોજ ગાંધીનગર જિલ્લાની તમામ આંગણવાડીઓ, પ્રાથમિક તથા માધ્યમિક સરકારી, અનુદાનિત અને સ્વનિર્ભર તમામ શાળાઓ તથા કોલેજો અને શૈક્ષણિક સંસ્થાઓમાં શૈક્ષણિક કાર્ય બંધ રહેશે અને રજા જાહેર કરવામાં આવી છે.
‌ નાગરિકોને પણ વરસાદ અને વીજળીના કડાકા-ભડાકા દરમિયાન બિનજરૂરી બહાર ન નીકળવા, વીજળીના થાંભલાઓથી દૂર રહેવા અને વૃક્ષો નીચે ઉભા ન રહેવા ઉપરાંત કોઈપણ કટોકટીની સ્થિતિમાં જિલ્લા આપત્તિ વ્યવસ્થાપન કેન્દ્નનો સંપર્ક કરવા જિલ્લા વહીવટી તંત્ર દ્વારા અનુરોધ કરવામાં આવ્યો છે.