ગાંધીનગર જિલ્લામાં સતત બીજા દિવસે મેઘમહેર: દહેગામ તાલુકામાં ૪ ઈંચથી વધુ વરસાદ

ગાંધીનગર જિલ્લામા આજરોજ સમગ્ર ગાંધીનગર જિલ્લામાં સાર્વત્રિક વરસાદી માહોલ રહ્યો હતો. આજે સવારના ૬:૦૦ વાગ્યાથી રાત્રિના ૧૦:૦૦ વાગ્યા સુધીમાં જિલ્લામાં સરેરાશ ૬૧ મિ.મી. આશરે ૨.૫ ઈંચ વરસાદ નોંધાયો છે, જેના પરિણામે ચાલુ મોસમનો કુલ સરેરાશ વરસાદ ૩૧૪ મિ.મી. પર પહોંચ્યો છે.
ગાંધીનગર જિલ્લાના છેલ્લા ૧૦ વર્ષના સરેરાશ ૭૭૭ મિ.મી. વરસાદની સરખામણીએ ચાલુ મોસમમાં અત્યાર સુધીમાં કુલ ૩૧૪ મિ.મી. એટલે કે ૪૦.૪૧% વરસાદ નોંધાઈ ચૂક્યો છે.
આજના દિવસમાં જિલ્લામાં સૌથી વધુ વરસાદ દહેગામ તાલુકામાં ૧૦૭ મિ.મી. ૪.૨૧ ઈંચ વરસાદ નોંધાયો છે. જેમાં સવારે ૧૦:૦૦ થી ૧૨:૦૦ વાગ્યાના સમયગાળા દરમિયાન જ ૪૭ મિ.મી. જેટલો અનરાધાર વરસાદ ખાબક્યો હતો. દહેગામનો ચાલુ મોસમનો કુલ વરસાદ ૩૦૩ મિ.મી. થયો છે.
માણસા તાલુકામાં આજે ૬૯ મિ.મી. આશરે ૨.૭ ઈંચ, ગાંધીનગર તાલુકામાં ૩૮ મિ.મી. આશરે ૧.૫ ઈંચ અને કલોલ તાલુકામાં ૩૦ મિ.મી. ૧ ઈંચથી વધુ વરસાદ થયો છે. જે અનુસાર માણસા તાલુકામાં ચાલુ મોસમનો કુલ વરસાદ ૩૫૩ મિ.મી, ગાંધીનગર તાલુકામાં ૨૬૪ મિ.મી. અને કલોલ તાલુકામાં ૩૩૬ મિ.મી.સુધી પહોંચ્યો છે. જિલ્લા વહીવટી તંત્રના કન્ટ્રોલ રૂમ દ્વારા તમામ તાલુકાઓની વરસાદી પરિસ્થિતિ પર સતત નજર રાખવામાં આવી રહી છે. સાર્વત્રિક વરસાદની પરિસ્થિતિથી લોકોમાં હર્ષની લાગણી જોવા મળી રહી છે.