ગાંધીનગરમાં ગુજરાત રાજ્ય યોગ બોર્ડ દ્વારા ધામધૂમથી ‘ગુરુપૂર્ણિમા’ પર્વની ઉજવણી કરાઈ
ગુજરાત રાજ્ય યોગ બોર્ડ દ્વારા ગાંધીનગર શહેરના તમામ સેક્ટર અને વોર્ડ કક્ષાએ ચાલી રહેલા યોગ ક્લાસિસમાં ગુરુપૂર્ણિમા મહોત્સવની ભવ્ય ઉજવણી કરવામાં આવી હતી. આ પાવન પ્રસંગે સાધકો દ્વારા યોગ ગુરુઓનું સન્માન કરી ગુરુવંદના કરવામાં આવી હતી. ગાંધીનગર જિલ્લા કોઓર્ડિનેટર શ્રીમતી ભાવનાબેનના માર્ગદર્શન હેઠળ આ સમગ્ર કાર્યક્રમનું સફળ આયોજન કરવામાં આવ્યું હતું. વિવિધ સેક્ટરમાં આયોજિત આ ઉજવણીમાં યોગ નિદર્શન કરવામાં આવ્યું હતું તથા સ્થાનિક વોર્ડના કોર્પોરેટરશ્રીઓએ વિશેષ ઉપસ્થિતિ આપી પ્રોત્સાહિત કર્યા હતા.
કાર્યક્રમ દરમિયાન ઉપસ્થિત મહાનુભાવો અને યોગસાધકોએ જીવનમાં યોગ અને ગુરુનું મહત્વ સમજાવ્યું હતું. ગાંધીનગરના વિવિધ વિસ્તારોમાં આયોજિત આ કાર્યક્રમોમાં મોટી સંખ્યામાં નાગરિકો અને યોગસાધકો ઉત્સાહભેર જોડાયા હતા અને આયોજનને અભૂતપૂર્વ સફળતા અપાવી હતી.
