ગાંધીનગર કલેક્ટરના અધ્યક્ષસ્થાને ‘જિલ્લા શિક્ષણ તાલીમ ભવન’ની કાર્યક્રમ સલાહકાર સમિતિની બેઠક યોજાઈ

ગાંધીનગર કલેકટર કચેરી ખાતે ‘જિલ્લા શિક્ષણ તાલીમ ભવન, ગાંધીનગર’ની કાર્યક્રમ સલાહકાર સમિતિની બેઠક કલેકટરશ્રી રવિન્દ્ર ખતાલેના અધ્યક્ષસ્થાને અને જિલ્લા વિકાસ અધિકારી શ્રી દિગંત બ્રહ્મભટ્ટના ઉપાધ્યક્ષસ્થાને યોજાઈ હતી. આ બેઠકમાં જિલ્લા શિક્ષણ તાલીમ ભવન, ગાંધીનગર દ્વારા વર્ષ ૨૦૨૫-૨૬માં હાથ ધરાયેલા વિવિધ કાર્યક્રમો તથા વર્ષ ૨૦૨૬-૨૭ના વાર્ષિક આયોજનમાં સમાવિષ્ટ શૈક્ષણિક પ્રવૃત્તિઓનું વિશેષ પ્રેઝન્ટેશન રજૂ કરવામાં આવ્યું હતું. કલેક્ટરશ્રી રવિન્દ્ર ખતાલેએ આ ઉત્કૃષ્ટ શૈક્ષણિક કામગીરીને બિરદાવીને સમગ્ર ટીમને અભિનંદન પાઠવ્યા હતા.
બેઠક દરમિયાન શિક્ષકો અને વિદ્યાર્થીઓમાં વાંચન પ્રત્યે રસ અને અભિરૂચિ કેળવાય તે બાબતે સવિશેષ ભાર મૂકવામાં આવ્યો હતો. વાંચન અભિમુખતા કાર્યક્રમના ભાગરૂપે તમામ શાળાઓ અને શૈક્ષણિક સંસ્થાઓમાં વિદ્યાર્થીઓ પ્રેરણાદાયી પુસ્તકો વાંચતા થાય તે માટે એક વ્યાપક પુસ્તક વાંચન ઝુંબેશ માટે કલેક્ટરશ્રીએ માર્ગદર્શન પૂરું પાડ્યું હતું. શાળાઓની દૈનિક પ્રાર્થના સભામાં શિક્ષકો તેમજ વિદ્યાર્થીઓ પોતાના વાંચેલા પુસ્તકોની ટૂંકી ‘પુસ્તક સમીક્ષા’ રજૂ કરે તે પ્રકારનું વાતાવરણ ઊભું કરવા પ્રોત્સાહિત કરવામાં આવ્યા હતા. આ બેઠકમાં કાર્યક્રમ સલાહકાર સમિતિના તમામ સભ્યો ઉપસ્થિત રહ્યા હતા અને જિલ્લામાં શૈક્ષણિક ગુણવત્તા તથા વાંચન સંસ્કૃતિના વિકાસ માટે સંકલ્પબદ્ધતા દર્શાવી હતી.