હવે ૧૦૮ એમ્બ્યુલન્સમાં સર્પદંશની સારવાર માટે સ્નેક વેનમ એન્ટિસેરમ ઈન્જેક્શન ઉપલબ્ધ

ગાંધીનગર તા.૦૩ ઓક્ટોબર-
અકસ્માત અને ઈમરજન્સી સેવાઓમાં નાગરિકો માટે આશીર્વાદરૂપ સાબિત થયેલી ૧૦૮ ઈમરજન્સી એમ્બ્યુલન્સ સેવા દ્વારા વધુ એક મહત્વપૂર્ણ નિર્ણય લેવામાં આવ્યો છે. સાપ કરડવાની ઘટનાઓમાં દર્દીને ગોલ્ડન અવરમાં જ ત્વરિત અને જીવનરક્ષક સારવાર મળી રહે તે હેતુથી હવે ૧૦૮ એમ્બ્યુલન્સમાં ‘સ્નેક વેનમ એન્ટિસેરમ’ ઈન્જેક્શન ઉપલબ્ધ કરાવવામાં આવ્યા છે.
​ અગાઉ સર્પદંશના કિસ્સામાં દર્દીને હોસ્પિટલ પહોંચાડવામાં થતા વિલંબના કારણે જીવનું જોખમ વધી જતું હતું. પરંતુ આ નવી વ્યવસ્થાથી ઘટનાસ્થળે જ પ્રાથમિક સારવાર સાથે ઈન્જેક્શન આપી શકાશે.
જો કોઈ વ્યક્તિને સાપ કરડે તો જરાય સમય ગુમાવ્યા વગર તુરંત જ ૧૦૮ પર કોલ કરી એમ્બ્યુલન્સની મદદ મેળવવી.૧૦૮ ની ટીમ પીડિત વ્યક્તિના સ્થાન અથવા ઘર સુધી પહોંચીને ઘટનાસ્થળે જ જરૂરી “સ્નેક વેનમ એન્ટિસેરમ” ઈન્જેક્શન તથા યોગ્ય પ્રાથમિક સારવાર પૂરી પાડશે.
ઈમરજન્સી સારવાર આપ્યા બાદ દર્દીને વધુ નિરીક્ષણ માટે નજીકની યોગ્ય હોસ્પિટલમાં સલામત રીતે પહોંચાડવામાં આવશે.સર્પદંશના સમયે અફવાઓ કે ઝાડા-પોતા જેવા અંધશ્રદ્ધાળુ ઉપાયોમાં સમય બગાડવાને બદલે વૈજ્ઞાનિક અને તાત્કાલિક તબીબી સારવાર જ જીવ બચાવી શકે છે. ત્યારે જરૂરિયાતમંદ નાગરિકોને આ સારવાર મેળવવા માટે જિલ્લા આરોગ્ય તંત્ર દ્વારા ૧૦૮નો સંપર્ક કરવા અનુરોધ કરવામાં આવ્યો છે.