ગાંધીનગર જિલ્લાના તમામ પાત્ર નાગરિકો અને યુવાનોના મતદારયાદીમાં નામ નોંધાવવા માટે યોજાશે ‘ખાસ ઝુંબેશ’: કલેકટર

ગાંધીનગર તા.૦૩ ઓક્ટોબર –
ભારતના ચૂંટણી પંચ તથા મુખ્ય નિર્વાચન અધિકારીશ્રી, ગુજરાત રાજ્યની સૂચના અનુસાર ગાંધીનગર જિલ્લામાં મતદારયાદીની સતત સુધારણા પ્રક્રિયા અંતર્ગત ખાસ ઝુંબેશનું આયોજન કરવામાં આવ્યું છે. જિલ્લા ચૂંટણી અધિકારીશ્રી રવિન્દ્ર ખતાલે દ્વારા જણાવવામાં આવ્યું હતું કે, આ ખાસ ઝુંબેશમાં ગાંધીનગર જિલ્લાના તમામ વિધાનસભા મતદાર વિભાગોમાં તા. ૧૧,૧૮ અને ૨૫ ઓક્ટોબર તેમજ ૦૧ નવેમ્બરના રોજ સવારે ૧૦:૦૦ કલાકથી સાંજે ૦૫:૦૦ કલાક સુધી પાત્ર નાગરિકો નિયત દિવસો દરમિયાન પોતાના મતદાન મથકેથી ફોર્મ મેળવીને બી.એલ.ઓને જરૂરી પુરાવા સાથે અરજી રજૂ કરી શકશે.
આ ઝુંબેશમાં મતદારયાદીમાં નોંધણી કરાવવાથી બાકી રહી ગયેલા નાગરિકો તેમજ પ્રથમ વખત મતદાર બનવા પાત્ર યુવાનોના નામ ઝડપથી નોંધાઈ શકે તે સુનિશ્ચિત કરવામાં આવશે. SIR તબક્કા માટે ફોર્મ-૬ સાથે જોડાતું ઘોષણા પત્રક આ સમયગાળા દરમિયાન વાપરવાનું રહેશે નહીં. ગાંધીનગર જિલ્લા ચૂંટણી તંત્ર દ્વારા તમામ પાત્ર નાગરિકો, ખાસ કરીને પ્રથમ વખત મતદાર બનતા યુવાનોને આ ખાસ ઝુંબેશનો મહત્તમ લાભ લઈ, લોકશાહીની પ્રક્રિયામાં સહભાગી થઈને પોતાનું નામ મતદારયાદીમાં અચૂક નોંધાવવા જિલ્લા ચૂંટણી અધિકારીશ્રી રવિન્દ્ર ખતાલે દ્વારા નમ્ર અનુરોધ કરવામાં આવ્યો છે.