ગાંધીનગર ખાતે મતદાન જાગૃતિ અંગે ચિત્ર સ્પર્ધા યોજાઇ

વિધાનસભાની ચૂંટણીને અનુલક્ષીને આજની યુવા પેઢી વધુમાં વધુ મતદાન કરે એ માટે પ્રયોશા મહિલા વિકાસ એજ્યુકેશન એન્ડ ચેરીટેબલ ટ્રસ્ટ અને ગાંધીનગર ટેક્વોન્ડો એસોસિએશન – મિલાપ ટાટારિઆ દ્વારા સેક્ટર-૧૩/એ ખાતે મતદાન જાગૃતિ ના વિષય પર ચિત્ર સ્પર્ધાનું આયોજન કરવામાં આવ્યું હતું. આ સ્પર્ધામાં ગાંધીનગરના બાળકોએ ઉત્સાહભેર ભાગ લીધો હતો. ભાગ લેનાર તમામ સ્પર્ધકો પોતાની કલા અને આવડત વડે મતદાન જાગૃતિ ના વિષય પર ચિત્ર દોરી અનેક સંદેશો આપી રહ્યા હતા અને પ્રયોશા મહિલા વિકાસ એજ્યુકેશન એન્ડ ચેરીટેબલ ટ્રસ્ટના લક્ષ્મી જોષી નો વિશેષ સહયોગ રહ્યો હતો. સ્પર્ધામાં પ્રથમ વિજેતા વૈદિક જૈન, દ્વિતીય વિજેતા હાર્દ વસાવડા અને તૃતીય વિજેતા તુલસી ઠાકોર રહ્યા હતા. વિજેતાઓને ટ્રોફી આપી સન્માનિત કરવામાં આવ્યા હતા તથા ભાગ લેનાર તમામ સ્પર્ધકોને પ્રમાણપત્ર અને ઇનામો આપી પ્રોત્સાહિત કરવામાં આવ્યા હતા ત્યારે આયોજક મિલાપ ટાટારિઆએ જણાવ્યું હતું કે, મતદાનની પવિત્રતા અને રાષ્ટ્રના ઘડતર માટે એક એક મત અમુલ્ય છે માટે ગાંધીનગરના પ્રત્યેક નાગરિકે પવિત્ર ફરજ સમજીને મતદાન કરવું જોઇએ.