ટ્રમ્પના ટેરિફ પ્રસ્તાવ પર નિક્કી હેલીનો વાંધો: ભારત-અમેરિકા સંબંધોને નુકસાન થશે

અમેરિકાના પૂર્વ રાજદૂત નિક્કી હેલીએ ભૂતપૂર્વ રાષ્ટ્રપતિ ડોનાલ્ડ ટ્રમ્પના ભારતીય ઉત્પાદનો પર ઊંચા ટેરિફ લાદવાના નિર્ણયની સખત ટીકા કરી છે. હેલીએ ચેતવણી આપી છે કે આ પગલાથી ભારત અને અમેરિકાના સંબંધો ખરાબ થઈ શકે છે. તેમણે ટ્રમ્પ વહીવટીતંત્ર પર બેવડા ધોરણો અપનાવવાનો આરોપ લગાવ્યો છે.

હેલીએ X (પહેલાં ટ્વિટર) પર જણાવ્યું કે, એક તરફ અમેરિકા ચીન જેવા દુશ્મન દેશને 90 દિવસની ટેરિફ મુક્તિ આપી રહ્યું છે, જે રશિયા અને ઈરાન પાસેથી સૌથી વધુ તેલ ખરીદી રહ્યું છે. બીજી તરફ, ભારત જેવા મજબૂત મિત્ર દેશ સામે કડક વલણ અપનાવવામાં આવી રહ્યું છે. તેમણે કહ્યું કે ભારતે રશિયા પાસેથી તેલ ખરીદવાનું બંધ કરવું જોઈએ, પરંતુ ચીનને મુક્તિ આપવી અને ભારત સાથે સંબંધો બગાડવા એ યોગ્ય નથી.

નિક્કી હેલી હંમેશા ભારત અને અમેરિકા વચ્ચેના મજબૂત સંબંધોની તરફેણમાં રહ્યા છે. તેમનું માનવું છે કે ચીનના વધતા પ્રભાવને અટકાવવા માટે ભારત જેવા લોકશાહી દેશો સાથે મજબૂત ભાગીદારી અત્યંત જરૂરી છે. આ ટિપ્પણી ટ્રમ્પના એ નિવેદન પછી આવી છે, જેમાં તેમણે ભારતીય સામાન પર 25% ટેરિફ વધારવાની જાહેરાત કરી હતી, જે 1 ઓગસ્ટથી લાગુ કરવામાં આવ્યો છે. આ ટેરિફ રશિયા સાથેના ભારતના ક્રૂડ ઓઈલના વેપારને કારણે લાદવામાં આવ્યો છે.