ગાંધીનગરમાં વોકલ ફોર લોકલ: બાળકોએ જાતે જ ગણેશજીની માટીની મૂર્તિઓ બનાવી

ગાંધીનગરમાં ઇકો-ફ્રેન્ડલી ગણેશોત્સવનો પ્રારંભ: ઇન્દ્રોડા પાર્કમાં માટીની ગણેશ મૂર્તિ બનાવવાનો વર્કશોપ યોજાયો

ગાંધીનગર: પર્યાવરણને અનુકૂળ ગણેશોત્સવની ઉજવણીને પ્રોત્સાહન આપવા માટે ગાંધીનગરના ઇન્દ્રોડા પ્રકૃતિ ઉદ્યાન ખાતે એક અનોખા ‘ઇકો એક્ટિવિટી’ વર્કશોપનું આયોજન કરવામાં આવ્યું હતું. વન વિભાગ હેઠળના ગીર ફાઉન્ડેશન દ્વારા આયોજિત આ કાર્યક્રમમાં અંદાજે 100થી વધુ બાળકો અને યુવાનોએ ઉત્સાહપૂર્વક ભાગ લીધો હતો અને માટીમાંથી ભગવાન ગણેશની ઇકો-ફ્રેન્ડલી મૂર્તિઓ બનાવતા શીખ્યા હતા.

આ કાર્યક્રમનો મુખ્ય હેતુ લોકોને પીઓપી અને કેમિકલ રંગોથી બનેલી મૂર્તિઓને બદલે માટીની મૂર્તિઓ અપનાવવા માટે જાગૃત કરવાનો હતો, કારણ કે આવી મૂર્તિઓ પર્યાવરણ અને જળચર જીવો માટે ખૂબ જ હાનિકારક હોય છે. આ વર્કશોપમાં ઉપસ્થિત કલાકારોએ ભાગ લેનારાઓને માટીમાંથી સુંદર ગણેશજીની મૂર્તિઓ કેવી રીતે બનાવવી તે શીખવ્યું હતું. ભાગ લેનારાઓને પોતે બનાવેલી મૂર્તિઓ ઘરે લઈ જવાની પણ પરવાનગી આપવામાં આવી હતી.

આ પહેલ દ્વારા વડાપ્રધાનના ‘વોકલ ફોર લોકલ’ના સૂત્રને પણ સાર્થક કરવા પર ભાર મૂકવામાં આવ્યો હતો, જેથી સ્થાનિક કલાકારોને પ્રોત્સાહન અને રોજગારી મળી રહે. ગીર ફાઉન્ડેશનના જણાવ્યા અનુસાર, આ વર્કશોપનો ઉદ્દેશ્ય લોકોને તહેવારોમાં પર્યાવરણને અનુકૂળ જીવનશૈલી અપનાવવા માટે પ્રેરિત કરવાનો હતો. આ પ્રકારના વર્કશોપના આયોજનથી ભવિષ્યમાં ઇકો-ફ્રેન્ડલી ગણેશોત્સવનું ચલણ વધશે તેવી આશા રાખવામાં આવે છે.