અમદાવાદમાં કાયદો તોડનાર પોલીસકર્મી: નશામાં ધૂત થઈને કાર ચલાવી, રિક્ષાને ટક્કર મારીને પલટાવી

અમદાવાદ: શહેરના વિશાલા સર્કલ પાસે બુધવારે મોડી રાત્રે એક પોલીસકર્મીએ દારૂના નશામાં બેફામ કાર ચલાવીને ગંભીર અકસ્માત સર્જ્યો હતો. આ અકસ્માતમાં કારે એક રિક્ષાને જોરદાર ટક્કર મારી, જેના કારણે રિક્ષા પલટી મારી ગઈ અને તેના ચાલકને ગંભીર ઈજા થઈ. આ ઘટના બાદ રોષે ભરાયેલા લોકોએ નશામાં ધૂત પોલીસકર્મીને પકડીને પોલીસને હવાલે કર્યો હતો. અકસ્માત સર્જનાર પોલીસકર્મીનું નામ પ્રકાશ વેરશીભાઈ રબારી છે, જે વટવા પોલીસ સ્ટેશનમાં ફરજ બજાવે છે. તે પોતાની કારને પૂરઝડપે અને બેફામ રીતે હંકારી રહ્યો હતો ત્યારે તેણે રિક્ષાને પાછળથી ટક્કર મારી. ટક્કર એટલી જોરદાર હતી કે રિક્ષા હવામાં ફંગોળાઈ અને પલટી ગઈ. આ ઘટનામાં રિક્ષાચાલકને માથા અને શરીરના અન્ય ભાગોમાં ગંભીર ઈજાઓ પહોંચી.

ઘટનાસ્થળે હાજર લોકોએ જણાવ્યું કે, પ્રકાશ રબારી નશામાં હતો. અકસ્માત બાદ લોકોનું ટોળું એકઠું થયું અને તેમણે તેને કારમાંથી બહાર કાઢીને પકડી લીધો. કારની તપાસ કરતા તેમાંથી પોલીસનો યુનિફોર્મ, બિયરની ખાલી બોટલો અને બીજી નંબર પ્લેટ પણ મળી આવી હતી, જેના કારણે લોકોનો રોષ વધુ ભભૂક્યો હતો. આ સમગ્ર મામલે એમ ડિવિઝન ટ્રાફિક પોલીસે પ્રકાશ રબારી વિરુદ્ધ ગુનો નોંધીને તપાસ શરૂ કરી છે. પોલીસે જણાવ્યું કે, આરોપીનો બ્લડ રિપોર્ટ લેવામાં આવ્યો છે અને તેના આધારે કાયદેસરની કાર્યવાહી કરવામાં આવશે. હાલ ઈજાગ્રસ્ત રિક્ષાચાલકની હોસ્પિટલમાં સારવાર ચાલી રહી છે, જ્યાં તેની હાલત સ્થિર હોવાનું જાણવા મળ્યું છે.