અમદાવાદના સરખેજમાં ફ્લેટમાં ભીષણ આગ: લિથિયમ બેટરીના રિસર્ચ દરમિયાન દુર્ઘટના, 3 યુવકો દાઝી ગયા
અમદાવાદના સરખેજ વિસ્તારમાં એલ.જે. કેમ્પસ રોડ પર આવેલા સેવી સ્ટ્રેટા એપાર્ટમેન્ટના બી બ્લોકમાં વહેલી સવારે એક ગંભીર આગની ઘટના સામે આવી છે. માહિતી મુજબ, ફ્લેટમાં લિથિયમ બેટરી પર રિસર્ચ ચાલી રહ્યું હતું, તે દરમિયાન વહેલી સવારે લગભગ 3 વાગ્યે આગ લાગી હતી. જોકે, આગ વધુ પ્રસરે તે પહેલાં તેના પર કાબૂ મેળવી લેવાયો હતો.
આ દુર્ઘટનામાં રિસર્ચ સાથે જોડાયેલા ત્રણ યુવકો દાઝી ગયા હતા, જેમણે તાત્કાલિક સારવાર માટે હોસ્પિટલમાં ખસેડવામાં આવ્યા છે. આ આગની ઘટના બાદ એપાર્ટમેન્ટમાં ચાલતા પેઇંગ ગેસ્ટ (PG) ના અનધિકૃત ધંધાને લઈને સ્થાનિક રહેવાસીઓમાં ઉગ્ર નારાજગી જોવા મળી છે.
સ્થાનિકોનો દાવો છે કે 90 ટકાથી વધુ ફ્લેટ્સમાં નિયમોનું ઉલ્લંઘન કરીને PG ચાલી રહ્યા છે. રહેવાસીઓએ સોસાયટીના ચેરમેન અને સેક્રેટરી પર PGના આ ગેરકાયદેસર ધંધા સામે અવાજ ઉઠાવનારા લોકોને ડરાવવા-ધમકાવવાનો પણ આક્ષેપ કર્યો છે. આ ઘટનાએ રહેણાક સોસાયટીઓમાં ચાલતી કોમર્શિયલ પ્રવૃત્તિઓ અને તેની સુરક્ષાના મુદ્દાઓને ફરી એકવાર ચર્ચાના કેન્દ્રમાં લાવી દીધા છે.
