પાટનગરમાં પાન-મસાલા, ગુટખાના વધુ ભાવ લઈ ખુલ્લેઆમ લૂંટ

ગાંધીનગર :
પાન-મસાલા, ગુટખા અને તમાકુ જેવી હાનિકારક વસ્તુઓનો ઉપયોગ ઘટાડવા માટે સરકાર દ્વારા ટેક્સમાં વધારો કરવામાં આવ્યો છે. જેમાં તા.1 ફેબ્રુઆરી 2026થી પાન-મસાલા, ગુટખા અને તમાકુના ઉત્પાદનો પર GST (ગુડ્સ અને સર્વિસ ટેક્સ) માં 28% થી વધારીને 40% કરવામાં આવ્યો છે.
જેને લઈને પાન-મસાલા અને ગુટકા મોંઘા થતાં તેના બંધાણીઓ પર તેની અસર થઈ છે, જોકે અમદાવાદ અને ગાંધીનગર જીલ્લા અને આસપાસના વિસ્તારમાં તકનો લાભ કાળાબજારીયાઓ અને દુકાનદારો લઇ રહ્યા હોય એમ લાગી રહ્યું છે, કારણ કે માર્કેટમાં ગુટકાની પડીકીઓ પર મારેલી પ્રિન્ટ કરતા ગ્રાહકો પાસેથી વધારે ભાવ વસૂલવામાં આવતો હોવાનું સામે આવ્યું છે. પાટનગર અને આસપાસના વિસ્તારમાં પાન-મસાલાના ગલ્લાઓ પર તાનસેન નામની ગુટકાની પડીકી પર 5 રૂપિયા કિંમત લખેલી હોવા છતાં દુકાનદારો તે પડીકીનો સીધો ભાવ 7 રૂપિયા ગ્રાહકો પાસેથી લેવામાં આવતો હોય છે, સાથે જ આર.એમ.ડી. ગુટકાની પડીકીના પણ 10 રૂપિયાના બદલે 12 થી 15 રૂપિયા ભાવ વસુલવામાં આવતા હોવાનું જાણવા મળે છે.
સરકાર દ્વારા પાન-મસાલા, ગુટખા અને તમાકુ ઉત્પાદનો પર GST માં 40% ની જાહેરાત બાદ માર્કેટમાં જાણે કે તેનો અમલ શરૂ થઇ ગયો હોય એમ ગુટકાની પડીકીઓ પર મારેલી પ્રિન્ટ કરતા વધુ કિંમત લેવામાં આવતા ગ્રાહકો પાસેથી ખુલ્લી લૂંટ ચલાવાતી હોય એમ લાગી રહ્યું છે.