ગાંધીનગર વિધાનસભા પરિસર ખાતે વિશાળ મેડિકલ કેમ્પનું આયોજન: ૭૦૦થી વધુ લાભાર્થીઓએ લીધો આરોગ્ય સેવાનો લાભ

ગાંધીનગર સ્થિત વિધાનસભા પરિસર ખાતે આજે GMERS મેડિકલ કોલેજ સંલગ્ન સિવિલ હોસ્પિટલ દ્વારા સર્વાંગી આરોગ્ય સેવાઓ પહોંચાડવાના ઉમદા હેતુથી એક વિશાળ મેડિકલ કેમ્પનું સફળ આયોજન કરવામાં આવ્યું હતું. આ કેમ્પનો મુખ્ય ઉદ્દેશ્ય વિધાનસભા પરિસરમાં કાર્યરત અધિકારીઓ, કર્મચારીઓ તેમજ મુલાકાતીઓને એક જ સ્થળે તમામ નિષ્ણાત તબીબી સેવાઓ સુલભ કરાવવાનો હતો.

આ મેડિકલ કેમ્પ દરમિયાન વિવિધ વિભાગોના નિષ્ણાત તબીબોની ટીમે કુલ ૭૨૬ જેટલા લાભાર્થીઓની આરોગ્ય તપાસ કરી હતી. વિભાગવાર વિગતો જોઈએ તો, મેડિસિન વિભાગ દ્વારા ૩૪૨, ત્વચા (સ્કિન) વિભાગ દ્વારા ૭૦, સ્ત્રીરોગ (ગાયનેકોલોજી) દ્વારા ૩૩, ઈએનટી (નાક-કાન-ગળું) વિભાગ દ્વારા ૭૨, આંખના રોગો (ઓપ્થલ્મોલોજી) વિભાગ દ્વારા ૩૧, સર્જરી વિભાગ દ્વારા ૩૫, ઓર્થોપેડિક્સ (હાડકા) વિભાગ દ્વારા ૬૪ અને દંત ચિકિત્સા વિભાગ દ્વારા ૭૯ દર્દીઓને જરૂરી તબીબી પરામર્શ અને સારવાર આપવામાં આવી હતી.

કેમ્પને વધુ વ્યાપક અને વિશેષજ્ઞ બનાવવા માટે રાજ્યની પ્રતિષ્ઠિત સ્વાયત્ત સંસ્થાઓના તબીબો પણ જોડાયા હતા. જેમાં યુ.એન. મહેતા હાર્ટ હોસ્પિટલ દ્વારા ૨૨૭, આઈ.કે.ડી.આર.સી. (કિડની હોસ્પિટલ) દ્વારા ૧૧૫, આયુર્વેદ હોસ્પિટલ દ્વારા ૪૬૨ અને જી.સી.આર.આઈ. (કેન્સર હોસ્પિટલ) ના નિષ્ણાતો દ્વારા ૧૫ દર્દીઓનું નિદાન તેમજ માર્ગદર્શન કરવામાં આવ્યું હતું. GMERS સિવિલ હોસ્પિટલ દ્વારા કેમ્પના સ્થળે જ આધુનિક લેબોરેટરી સુવિધા ઊભી કરવામાં આવી હતી, જ્યાં દર્દીઓના નમૂના એકત્રિત કરી અંદાજે ૩૦૦૦ જેટલા વિવિધ લેબ ટેસ્ટ સ્થળ પર જ પૂર્ણ કરવામાં આવ્યા હતા. આ સાથે જ જરૂરી દવાઓનું પણ નિ:શુલ્ક વિતરણ કરવામાં આવ્યું હતું. વિધાનસભા પરિસરમાં આયોજિત આ બહુમુખી આરોગ્ય કેમ્પથી વહીવટી તંત્રના સભ્યો અને સામાન્ય નાગરિકોમાં ખુશીની લહેર જોવા મળી હતી. સમાજની આરોગ્ય સુરક્ષા પ્રત્યેની પોતાની પ્રતિબદ્ધતાને GMERS સિવિલ હોસ્પિટલે આ સફળ આયોજન દ્વારા પુનઃ પ્રસ્થાપિત કરી છે.