બાગાયત ખાતાની વિવિધ સહાયલક્ષી યોજનાઓ માટે I-Khedut 2.0 પોર્ટલ ખુલ્લુ મૂકાયું
ગાંધીનગર જિલ્લાના બાગાયતી ખેતી કરતા ખેડૂતો માટે ખુશીના સમાચાર છે. નાણાકીય વર્ષ ૨૦૨૬-૨૭ દરમિયાન બાગાયત ખાતાની વિવિધ સહાયલક્ષી યોજનાઓનો લાભ આપવા માટે સરકાર દ્વારા I-Khedut 2.0 પોર્ટલ આગામી તા.૨૭/૦૩/૨૦૨૬ થી તા.૨૬/૦૪/૨૦૨૬ સુધી ઓનલાઇન અરજીઓ કરવા માટે ખુલ્લું મૂકવામાં આવશે.
ખેડૂતો નીચે મુજબના વિવિધ બાગાયતી ઘટકો માટે અરજી કરી શકશે.ફળ પાક વાવેતરમાં આંબા, ટીશ્યુ કેળ, ટીશ્યુ ખારેક, કમલમ (ડ્રેગન ફ્રૂટ), પપૈયા, નાળિયેરી, જામફળ, લીંબુ, દાડમ વગેરે.ખેતી પદ્ધતિ અને ફૂલોમાં, શાકભાજીની પ્રાકૃતિક ખેતી, સરગવાની ખેતી, દાંડી ફૂલો, કંદ ફૂલો અને છુટા ફૂલો.
કયા ઘટકો માટે મળશે સહાય? પાણીના ટાંકા, કાચા/અર્ધ પાકા/પાકા મંડપ, ખેતર પરના શોર્ટીંગ પેકીંગ એકમ અને બાગાયતી પ્રોસેસિંગ યુનિટ.યાંત્રીક રણમાં મીની ટ્રેક્ટર, કલ્ટીવેટર, રોટાવેટર, ટ્રેલર અને પાણીનું ટેન્કર.
અન્ય સહાયમાં વોટર સોલ્યુબલ ખાતર, પેકિંગ મટીરિયલ, ક્રોપ/ફ્રૂટ કવર, જૂના બગીચાનું નવીનીકરણ, સ્વરોજગારલક્ષી નર્સરી અને મહિલા વૃતિકા તાલીમ આપવામાં આવશે.
અરજી કરવાની પ્રક્રિયા
૧. લાભ લેવા ઈચ્છતા ખેડૂતોએ વેબસાઈટ www.ikhedut.gujarat.gov.in પર જઈ અરજી કરવાની રહેશે.
૨. નોંધનીય છે કે, નવીન આઈ-ખેડુત પોર્ટલ ૨.૦ પર સૌપ્રથમ નોંધણી (Registration) કર્યા બાદ જ ખેડૂતો અરજી કરી શકશે.
૩. અરજીમાં માંગ્યા મુજબના જરૂરી સાધનિક કાગળો ઓનલાઇન અપલોડ કરવાના રહેશે.
૪. અરજી કન્ફર્મ (Confirm) કર્યા બાદ તેની પ્રિન્ટ લઈ ખેડૂતે પોતાની પાસે સુરક્ષિત રાખવાની રહેશે.
યોજનાઓની વધુ વિગતો અને માર્ગદર્શન માટે નાયબ બાગાયત નિયામકની કચેરી, ગાંધીનગર જિલ્લાનો સંપર્ક કરવા જણાવાયું છે. નિયત સમયમર્યાદામાં અરજી કરી દેવા ખેડૂત મિત્રોને અનુરોધ છે.
