ગાંધીનગર જિલ્લાની શાળાઓમાં ‘ઈલેક્ટોરલ લિટરસી ક્લબ’ દ્વારા EVM અને VVPAT અંગે સઘન માર્ગદર્શન કાર્યક્રમ યોજાયો
આગામી તા. ૨૬/૦૪/૨૦૨૬ ના રોજ યોજાનાર સ્થાનિક સ્વરાજ્યની ચૂંટણીઓમાં લોકશાહીની પ્રક્રિયા વધુ પારદર્શક અને લોકભોગ્ય બને તે હેતુથી, રાજ્ય ચૂંટણી આયોગના SVAP (State Voters Awareness Programme) અંતર્ગત ગાંધીનગર જિલ્લામાં હાલ સઘન જાગૃતિ અભિયાન ચલાવવામાં આવી રહ્યું છે. આ અભિયાનના ભાગરૂપે આજે જિલ્લાની પ્રાથમિક, માધ્યમિક અને ઉચ્ચત્તર માધ્યમિક શાળાઓમાં કાર્યરત ઈલેક્ટોરલ લિટરસી ક્લબ (ELC) ના માધ્યમથી ભાવિ મતદારો માટે ‘EVM અને VVPAT’ ની ટેકનિકલ સમજ અંગેના વિશેષ માર્ગદર્શન કાર્યક્રમો યોજવામાં આવ્યા હતા. આ કાર્યક્રમનો મુખ્ય ઉદ્દેશ્ય આજના ટેકનોલોજીના યુગમાં ચૂંટણી પ્રક્રિયામાં ઉપયોગમાં લેવાતા આધુનિક મશીનો વિશે લોકોના મનમાં રહેલી શંકાઓ દૂર કરવી અને મતદાન પ્રક્રિયા પ્રત્યેનો વિશ્વાસ દ્રઢ કરવાનો રહ્યો હતો. આ તાલીમ દરમિયાન વિદ્યાર્થીઓને EVM (ઈલેક્ટ્રોનિક વોટિંગ મશીન) ની કાર્યપદ્ધતિ સમજાવતા તેના મુખ્ય બે ભાગો – કંટ્રોલ યુનિટ (Control Unit) અને બેલેટ યુનિટ (Ballot Unit) વિશે સરળ ભાષામાં માહિતગાર કરાયા હતા. જેમાં ઉમેદવારના નામ અને નિશાનની સામે આવેલું ભૂરું (Blue) બટન દબાવવાથી મત કઈ રીતે નોંધાય છે અને મત નોંધાયાની ખાતરી રૂપે સંભળાતા ‘બીપ’ (Beep) અવાજ અંગે પ્રાયોગિક સમજ અપાઈ હતી.
ચૂંટણી પ્રક્રિયાની સૌથી મહત્વની કડી એવા VVPAT (વોટર વેરિફાયબલ પેપર ઓડિટ ટ્રેલ) દ્વારા વધતી પારદર્શિતા વિશે પણ વિદ્યાર્થીઓને વિસ્તૃત માહિતી આપવામાં આવી હતી. જેમાં જણાવાયું હતું કે, મતદાતાએ આપેલો મત સાચી જગ્યાએ જ ગયો છે તેની ચકાસણી આ મશીન દ્વારા અત્યંત સરળતાથી થઈ શકે છે. બટન દબાવ્યા બાદ VVPAT ની પારદર્શક સ્ક્રીન પર ૭ સેકન્ડ માટે એક સ્લિપ દેખાય છે, જેમાં ઉમેદવારનું નામ, નિશાન અને ક્રમાંક છપાયેલો હોય છે, જે સાબિત કરે છે કે મત સંપૂર્ણપણે સુરક્ષિત છે. આ કાર્યક્રમ દ્વારા વિદ્યાર્થીઓ આ તકનીકી બાબતો સમજીને પોતાના વાલીઓ અને આસપાસના નાગરિકોને સાચી માહિતી પહોંચાડે અને લોકશાહીના મહાપર્વમાં સહભાગી બને તેવો ઉમદા પ્રયાસ કરવામાં આવ્યો હતો.
