સ્થાનિક સ્વરાજ્યની ચૂંટણી અન્વયે ગાંધીનગર જિલ્લામાં નશાબંધીનો હુકમ

ગાંધીનગર જિલ્લાની નગરપાલિકા, જિલ્લા પંચાયત અને તાલુકા પંચાયતોની આગામી ચૂંટણીઓ શાંતિપૂર્ણ અને ન્યાયી વાતાવરણમાં સંપન્ન થાય તે માટે જિલ્લા મેજીસ્ટ્રેટ શ્રી રવિન્દ્ર ખતાલે દ્વારા મહત્વનો આદેશ જારી કરવામાં આવ્યો છે. ગુજરાત નશાબંધી અધિનિયમ-૧૯૪૯ ની કલમ-૧૪૨ હેઠળ મળેલ સત્તાનો ઉપયોગ કરી, જિલ્લાના ચૂંટણીલક્ષી વિસ્તારોમાં નિર્ધારિત સમયગાળા માટે પરવાના ધારકો માટે દારૂ અને નશાયુક્ત પદાર્થોના વેચાણ પર સંપૂર્ણ પ્રતિબંધ લાદવામાં આવ્યો છે.

આ જાહેરનામા અનુસાર, ગાંધીનગર, કલોલ, દહેગામ અને માણસા તાલુકાના હદ વિસ્તારમાં મતદાન પૂર્વે તા. ૨૫/૦૪/૨૦૨૬ ના સાંજે ૧૮:૦૦ કલાકથી તા.૨૬/૦૪/૨૦૨૬ ના રાત્રિના ૨૪:૦૦ કલાક સુધી, તેમજ મતગણતરીના દિવસે એટલે કે તા. ૨૮/૦૪/૨૦૨૬ ના રોજ સમગ્ર ૨૪ કલાક દરમિયાન દારૂ અને અન્ય નશાયુક્ત પદાર્થોનું વેચાણ કરતા તમામ પરવાનાધારક સ્થળો, દુકાનો, ક્લબ અને રેસ્ટોરન્ટ્સ ફરજિયાતપણે બંધ રાખવાના રહેશે. ચૂંટણી પ્રક્રિયા દરમિયાન કાયદો અને વ્યવસ્થાની જાળવણી તેમજ જાહેર સુરક્ષાના ભાગરૂપે લેવાયેલા આ હુકમનું ઉલ્લંઘન કરનાર વિરુદ્ધ ગુજરાત નશાબંધી અધિનિયમની જોગવાઈઓ હેઠળ કડક શિક્ષાત્મક કાર્યવાહી કરવામાં આવશે.