બાલિકા પંચાયતના સરપંચ હેલીબેનની પ્રેરણાદાયી શૈક્ષણિક સફર

દ્રઢ સંકલ્પ, યોગ્ય માર્ગદર્શન અને આત્મવિશ્વાસ હોય તો અધૂરા સપનાઓને પણ સાકાર કરી શકાય છે, આ વાત ગાંધીનગર જિલ્લાના દંતાલી ગામની દીકરીએ સાબિત કરી બતાવી છે. ગાંધીનગર તાલુકાના દંતાલી ગામમાં રહેતી રબારી હેલીબેનની સંઘર્ષ અને સફળતાની કહાની આજે જિલ્લાની અન્ય કિશોરીઓ માટે પ્રેરણાનો સ્ત્રોત બની છે.

એક સમય એવો હતો જ્યારે રબારી હેલીબેને વર્ષ 2018માં ધોરણ-9 પાસ કર્યા બાદ સામાજિક પરિસ્થિતિઓ અને કૌટુંબિક જવાબદારીઓના કારણે પોતાનો અભ્યાસ અધવચ્ચે જ છોડવો પડ્યો હતો. શિક્ષણ છૂટી ગયા બાદ જીવન જાણે એક મર્યાદિત પરિઘમાં આવી ગયું હતું, પરંતુ કુદરતે તેમના માટે કંઈક અલગ જ આયોજન કર્યું હતું.

હેલીબેનના જીવનમાં મોટો બદલાવ ત્યારે આવ્યો જ્યારે દંતાલી ગામમાં મહિલા અને બાળ વિકાસ વિભાગ અંતર્ગત ‘બાલિકા પંચાયત’ની રચના કરવામાં આવી. ગ્રામજનો અને કિશોરીઓ દ્વારા હેલીબેનને બાલિકા પંચાયતના ‘સરપંચ’ તરીકે સર્વાનુમતે પસંદ કરવામાં આવ્યા. આ નવી જવાબદારીએ હેલીબેનમાં અભૂતપૂર્વ આત્મવિશ્વાસનો સંચાર કર્યો. બાલિકા પંચાયતના સરપંચ તરીકે તેમણે ગામની કિશોરીઓ અને મહિલાઓના સશક્તિકરણ, સ્વાસ્થ્ય અને શિક્ષણ અંગેની વિવિધ જાગૃતિ પ્રવૃત્તિઓમાં સક્રિયતાથી ભાગ લઈ પ્રશંસનીય કામગીરી શરૂ કરી.

ડિસ્ટ્રીકટ હબ ફોર એમ્પાવરમેન્ટ ઓફ વુમનની પ્રેરણા રંગ લાવી
હેલીબેન જ્યારે ગામમાં સામાજિક કાર્યો કરી રહ્યા હતા, ત્યારે મહિલા અને બાળ અધિકારીની કચેરી હેઠળની ‘ડિસ્ટ્રીકટ હબ ફોર એમ્પાવરમેન્ટ ઓફ વુમન’ – DHEW યોજનાની ટીમનો તેમને સહયોગ મળ્યો. યોજના હેઠળ કાર્યરત કર્મચારીઓ સર્વશ્રી અશ્વિનભાઈ, અંકિતાબેન અને નસરીનબેન દ્વારા હેલીબેનની અંદર રહેલી ક્ષમતાને ઓળખવામાં આવી. આ ટીમે હેલીબેનને તેમનો અધૂરો અભ્યાસ ફરી શરૂ કરવા માટે સતત પ્રોત્સાહિત કર્યા. યોગ્ય કાઉન્સેલિંગ, સચોટ માર્ગદર્શન અને હિંમત મળતા જ હેલીબેને ફરી એકવાર પુસ્તકો હાથમાં લેવાનો મક્કમ નિર્ધાર કર્યો.

બાલિકા પંચાયતની જવાબદારીઓ સંભાળવાની સાથે-સાથે હેલીબેને તનતોડ મહેનત કરી અને વર્ષ 2026માં યોજાયેલી ધોરણ-10ની બોર્ડની પરીક્ષામાં ભવ્ય સફળતા મેળવી. શિક્ષણનું અસલી મહત્વ સમજી ચૂકેલા હેલીબેન હવે અટકવાના નથી; તેઓ હવે ધોરણ-11માં પ્રવેશ મેળવી પોતાના ભવિષ્યને વધુ ઉજ્જવળ બનાવવા માટે સજ્જ બન્યા છે.

આજે હેલીબેન માત્ર પોતે જ ભણી રહ્યા છે એવું નથી, પરંતુ ગામની અને આસપાસના વિસ્તારની અન્ય ડ્રોપ-આઉટ (ભણતર છોડી દીધેલું હોય તેવી) દીકરીઓને શોધીને તેમને પણ શિક્ષણના મુખ્ય પ્રવાહમાં જોડવા અને ફરીથી ભણતર શરૂ કરવા માટે પ્રેરિત કરી રહ્યા છે.

યોગ્ય માર્ગદર્શન અને આત્મવિશ્વાસથી કોઈપણ દીકરી પોતાના સપનાઓને ફરીથી જીવંત કરી શકે છે. ડિસ્ટ્રીકટ હબ ફોર એમ્પાવરમેન્ટ ઓફ વુમન યોજના અને બાલિકા પંચાયતના માધ્યમથી હેલીબેને મેળવેલી આ સિદ્ધિ એ નારી સશક્તિકરણનું ઉત્તમ ઉદાહરણ છે.