ગાંધીનગરના શિક્ષણ જગતમાં ખળભળાટ: રાજ સ્કૂલના પ્રિન્સિપાલના પુત્ર સામે POCSO અને એટ્રોસિટી હેઠળ ગુનો નોંધાયો

રાજ્યના પાટનગર ગાંધીનગરમાંથી શિક્ષણ જગતને કલંકિત કરતી એક ગંભીર અને ચોંકાવનારી ઘટના સામે આવી છે. સેક્ટર-25 સ્થિત જાણીતી રાજ સ્કૂલના પ્રિન્સિપાલના દીકરા વિરુદ્ધ શાળાની હોસ્ટેલમાં રહેતા ધોરણ-10ના સગીર વિદ્યાર્થી સાથે જાતીય શોષણ અને સૃષ્ટિ વિરુદ્ધનું કૃત્ય આચરવાનો આરોપ નોંધાયો છે. સમગ્ર ઘટનાએ શિક્ષણ જગતમાં ભારે ચકચાર મચાવી દીધી છે.
પ્રાપ્ત વિગતો મુજબ, પીડિત વિદ્યાર્થી રાજ સ્કૂલમાં અભ્યાસ માટે હોસ્ટેલમાં રહેતો હતો. આ દરમિયાન સ્કૂલના પ્રિન્સિપાલ અશ્વિન પટેલના દીકરા રાજ પટેલે વિદ્યાર્થી સાથે અયોગ્ય વર્તન શરૂ કર્યું હતું. ફરિયાદ અનુસાર, શરૂઆતમાં વિશ્વાસમાં લઈ શરીર પર અશોભનીય સ્પર્શ કર્યા બાદ આરોપીએ સગીરને પોતાની પાસે બોલાવી તેની મરજી વિરુદ્ધ વારંવાર સૃષ્ટિ વિરુદ્ધનું કૃત્ય આચર્યું હતું.
પીડિત વિદ્યાર્થીએ ભારે માનસિક અને શારીરિક યાતના વચ્ચે ધોરણ-10ની પરીક્ષા પૂર્ણ કરી હતી. પરીક્ષા બાદ પોતાના વતન પરત ફર્યા પછી પણ આરોપી દ્વારા સતત સંપર્ક કરી બ્લેકમેલ અને દબાણ કરવામાં આવતું હોવાનું ફરિયાદમાં જણાવાયું છે. સતત સતામણી અને માનસિક તણાવના કારણે વિદ્યાર્થીના અભ્યાસ અને પરિણામ પર પણ ગંભીર અસર પડી હોવાનું સામે આવ્યું છે. વિદ્યાર્થીના વર્તનમાં આવેલા બદલાવને પગલે પરિવારજનોએ પૂછપરછ કરતાં સમગ્ર હકીકત બહાર આવી હતી. ત્યારબાદ પરિવારે ગાંધીનગરના સેક્ટર-21 પોલીસ મથકમાં ફરિયાદ નોંધાવી હતી.
પોલીસે મામલાની ગંભીરતાને ધ્યાનમાં રાખી આરોપી રાજ પટેલ વિરુદ્ધ પોક્સો (POCSO) એક્ટ તેમજ એટ્રોસિટી એક્ટ હેઠળ ગુનો નોંધી કાયદેસરની કાર્યવાહી હાથ ધરી છે. સેક્ટર-21 પોલીસ મથકના પોલીસ ઇન્સ્પેક્ટર લતાબેન દેસાઈએ જણાવ્યું હતું કે ફરિયાદના આધારે ગુનો નોંધવામાં આવ્યો છે અને સમગ્ર મામલે વધુ તપાસ ચાલી રહી છે. આ ઘટનાએ વિદ્યાર્થી સુરક્ષા, હોસ્ટેલ વ્યવસ્થા અને શૈક્ષણિક સંસ્થાઓમાં જવાબદારીના પ્રશ્નો ફરી એકવાર ચર્ચાના કેન્દ્રમાં લાવી દીધા છે.