ગાંધીનગર સિવિલમાં ચોંકાવનારૂ કૌભાંડ: OTમાંથી 60 લાખના મશીનના પાર્ટ્સ ગુમ, પોલીસ ફરિયાદ પણ નહીં”
ગાંધીનગરની સરકારી સિવિલ હોસ્પિટલમાં ગંભીર બેદરકારી અને ગેરવહીવટનો ચોંકાવનારો મામલો સામે આવ્યો છે. હોસ્પિટલના ઓપરેશન થિયેટરમાં દર્દીઓની સારવાર માટે ઉપયોગમાં લેવાતા અંદાજે 60 લાખ રૂપિયાના અત્યાધુનિક મશીનના મહત્વના પાર્ટ્સ છેલ્લા 7થી 8 દિવસથી ગુમ હોવાનું બહાર આવ્યું છે. સૌથી ચિંતાજનક બાબત એ છે કે આટલી મોટી ઘટના છતાં હોસ્પિટલ તંત્ર દ્વારા હજુ સુધી પોલીસ ફરિયાદ નોંધાવવામાં આવી નથી.
મળતી માહિતી મુજબ, ઓર્થોપેડિક વિભાગના ઓપરેશન થિયેટરમાં ઉપયોગમાં લેવાતા ‘સી-વિઝન’ (C-Arm Imaging System) મશીનના મહત્વના પાર્ટ્સ ગુમ થયા છે. આ મશીન હાડકાં અને સાંધાના જટિલ ઓપરેશનો દરમિયાન અત્યંત જરૂરી ગણાય છે. પાર્ટ્સ ગુમ થતાં અનેક દર્દીઓની સારવાર અને સર્જરી પર સીધી અસર પડી હોવાનું જાણવા મળે છે.
તંત્ર મૌન કેમ?
સવાલ એ ઊભો થાય છે કે સરકારી હોસ્પિટલના અતિસુરક્ષિત ગણાતા ઓપરેશન થિયેટરમાંથી લાખો રૂપિયાના સાધનોના પાર્ટ્સ ગુમ થઈ જાય અને હોસ્પિટલ તંત્ર પોલીસ ફરિયાદ પણ ન કરે, તે કેવી રીતે શક્ય છે? શું કોઈને બચાવવાનો પ્રયાસ થઈ રહ્યો છે? જો પાર્ટ્સ ચોરી થયા હોય તો જવાબદાર કોણ? અને જો બેદરકારીથી ગુમ થયા હોય તો તેના માટે કોણ જવાબદાર?
દર્દીઓ ભોગ બની રહ્યા છે
આ મશીન ઓર્થોપેડિક સર્જરી માટે અત્યંત મહત્વનું હોવાનું કહેવાય છે. મશીન બંધ હાલતમાં હોવાથી અનેક દર્દીઓના ઓપરેશન અને સારવારમાં વિલંબ થવાની શક્યતા વ્યક્ત કરવામાં આવી રહી છે. સરકારી હોસ્પિટલમાં સારવાર માટે આવતા ગરીબ અને મધ્યમવર્ગીય દર્દીઓને તેનો સીધો ભોગ બનવું પડી શકે છે.
તપાસ નહીં, માત્ર આંતરિક ચર્ચાઓ?
સૂત્રોના જણાવ્યા અનુસાર ઘટનાની જાણ હોસ્પિટલના ઉચ્ચ અધિકારીઓ સુધી પહોંચી ગઈ છે, પરંતુ હજુ સુધી કોઈ કડક કાર્યવાહી કે સત્તાવાર તપાસના સંકેતો જોવા મળ્યા નથી. સામાન્ય નાગરિકોમાં પણ પ્રશ્ન ઉઠી રહ્યો છે કે જો ખાનગી હોસ્પિટલમાં આવી ઘટના બની હોત તો અત્યાર સુધીમાં પોલીસ અને તપાસ એજન્સીઓ સક્રિય થઈ ગઈ હોત.
જવાબદારો સામે કડક કાર્યવાહી કરવાની માંગ
આ સમગ્ર મામલે આરોગ્ય વિભાગ અને રાજ્ય સરકાર દ્વારા ઉચ્ચસ્તરીય તપાસ કરવામાં આવે, જવાબદારોને જાહેર કરવામાં આવે અને જો કોઈની બેદરકારી કે સંડોવણી સાબિત થાય તો તેમની સામે કડક કાર્યવાહી કરવામાં આવે તેવી માંગ ઉઠી રહી છે.
હાલ સૌથી મોટો પ્રશ્ન એ છે કે 60 લાખના મશીનના પાર્ટ્સ આખરે ગયા ક્યાં? અને આટલી મોટી ઘટના છતાં પોલીસ ફરિયાદ કેમ નોંધાઈ નથી? ગાંધીનગર સિવિલ હોસ્પિટલના તંત્રએ આ સવાલોના સ્પષ્ટ જવાબ આપવા જરૂરી બની ગયા છે.
