ગાંધીનગર મહાનગરપાલિકા દ્વારા આંતરરાષ્ટ્રીય યોગ દિવસની ઉજવણી: સેન્ટ્રલ વિસ્ટા ગાર્ડન તેમજ વિવિધ વોર્ડમાં નાગરિકો એકસાથે યોગાભ્યાસ કરશે
આગામી ૨૧મી જૂનના રોજ આંતરરાષ્ટ્રીય યોગ દિવસ નિમિત્તે ગાંધીનગર મહાનગરપાલિકા દ્વારા શહેરના સેન્ટ્રલ વિસ્ટા ગાર્ડન તેમજ તમામ વોર્ડમાં ભવ્ય સામુહિક યોગાભ્યાસ કાર્યક્રમોનું આયોજન કરવામાં આવ્યું છે. વડાપ્રધાન શ્રી નરેન્દ્રભાઈ મોદીના અથાક પ્રયાસોથી યોગને મળેલા વૈશ્વિક સન્માનને આગળ ધપાવવા માટે ચાલુ વર્ષે આંતરરાષ્ટ્રીય સ્તરે જાહેર કરાયેલી ‘યોગ ફોર હેલ્ધી એજિંગ’ થીમને કેન્દ્રમાં રાખીને આ કાર્યક્રમની રૂપરેખા તૈયાર કરવામાં આવી છે. આ આયોજનનો મુખ્ય ઉદ્દેશ્ય નગરજનોને વધતી વયે પણ શારીરિક અને માનસિક રીતે તંદુરસ્ત રહેવા માટે પ્રોત્સાહિત કરવાનો છે અને શહેરના દરેક નાગરિક સુધી યોગનો સંદેશ પહોંચાડવાનો છે.
સેન્ટ્રલ વિસ્ટા ગાર્ડન ખાતે યોજાનારા મુખ્ય કાર્યક્રમમાં ગુજરાત સરકારના રાજ્યકક્ષાના મંત્રી શ્રી કમલેશભાઈ પટેલ તેમજ ગુજરાત રાજ્ય બાળ આરોગ્ય સંસ્થાના ચેરમેન શ્રીમતી ધર્મિષ્ઠાબેન ગજ્જર ખાસ ઉપસ્થિત રહીને નાગરિકો સાથે યોગાભ્યાસમાં જોડાશે. આ સ્થળે શહેરના નાગરિકો ઉપરાંત પોલીસ જવાનો અને વિવિધ સામાજિક સંસ્થાઓ પણ ઉત્સાહભેર સહભાગી થશે. યોગનો વ્યાપ શહેરના છેવાડાના નાગરિકો સુધી પહોંચાડવા માટે મહાનગરપાલિકા દ્વારા તમામ વોર્ડમાં પણ સ્થાનિક કક્ષાએ યોગાભ્યાસની વિશેષ વ્યવસ્થા ઊભી કરવામાં આવી છે. સેન્ટ્રલ વિસ્ટા ગાર્ડન તેમજ શહેરના તમામ વોર્ડમાં યોજાનારા આ વિકેન્દ્રિત કાર્યક્રમો થકી સમગ્ર ગાંધીનગર મહાનગરપાલિકા વિસ્તારમાં મોટી સંખ્યામાં લોકો એક જ સમયે યોગ કરીને સ્વાસ્થ્ય જાગૃતિનું એક અનોખું ઉદાહરણ પૂરું પાડશે.
મોટી સંખ્યામાં જોડાનાર નાગરિકોની સુવિધા સુનિશ્ચિત કરવા માટે મહાનગરપાલિકા દ્વારા તમામ કાર્યક્રમ સ્થળો પર વહીવટી તૈયારીઓને આખરી ઓપ આપી દેવામાં આવ્યો છે. તમામ સ્થળોએ લોકો માટે યોગ્ય બેઠક વ્યવસ્થા, વાહનો માટે સુવ્યવસ્થિત પાર્કિંગ અને સઘન સાફ-સફાઈની કામગીરી પૂર્ણ કરવામાં આવી છે. આ વૈશ્વિક પર્વની ઉજવણીમાં સહભાગી થવા માટે તમામ નગરજનોને સવારે ૫:૩૦ કલાકે નિયત કાર્યક્રમ સ્થળોએ ઉપસ્થિત થઈ જવા ખાસ અપીલ કરવામાં આવે છે. વડાપ્રધાનના ‘સ્વસ્થ ભારત’ ના સંકલ્પને સાકાર કરવા માટે નાગરિકો પોતાના પરિવાર અને મિત્રો સાથે આ સામુહિક યોગાભ્યાસમાં બહોળી સંખ્યામાં જોડાઈને ગાંધીનગરને એક જાગૃત અને સ્વસ્થ શહેર તરીકે પ્રસ્થાપિત કરે તેવો અનુરોધ કરવામાં આવે છે.
