ઓશિયા મોલના કરોડોના કૌભાંડનો પર્દાફાશ! ડિરેક્ટર ધીરેન્દ્ર ચોપરા, પત્ની સહિત 13 સામે કરોડોની છેતરપિંડીની ફરિયાદ

ઓશિયા મોલ (ઓશિયા હાઇપર રિટેલ લિમિટેડ) ના ડિરેક્ટર ધીરેન્દ્ર ચોપરા, તેમની પત્ની કવિતા ચોપરા તેમજ અન્ય આરોપીઓ સામે ₹4.73 કરોડની છેતરપિંડી અંગે CID ક્રાઇમમાં ફરિયાદ નોંધાતા વેપારી વર્તુળમાં ભારે ખળભળાટ મચ્યો છે. ફરિયાદ મુજબ, અનેક વેપારીઓ પાસેથી કરોડો રૂપિયાનો માલ ખરીદવામાં આવ્યો હતો. શરૂઆતમાં વિશ્વાસ જીતવા માટે અમુક ચૂકવણીઓ કરવામાં આવી હતી, પરંતુ બાદમાં મોટા પ્રમાણમાં માલ ઉઠાવી લેવાયા પછી કરોડો રૂપિયાની બાકી રકમ ચૂકવવામાં આવી ન હોવાનું ફરિયાદમાં જણાવાયું છે.
આરોપ છે કે વેપારીઓને સતત ખોટા આશ્વાસનો આપવામાં આવ્યા, RTGS અને બેંક ટ્રાન્સફરના બહાના બતાવવામાં આવ્યા, પરંતુ રકમ તેમના ખાતામાં પહોંચી નહોતી. અનેક વેપારીઓએ વારંવાર ઉઘરાણી છતાં પૈસા ન મળતાં આખરે CID ક્રાઇમનો દરવાજો ખખડાવ્યો. ફરિયાદમાં ધીરેન્દ્ર ચોપરા, તેમની પત્ની કવિતા ચોપરા સહિત કુલ 13 આરોપીઓના નામ દર્શાવવામાં આવ્યા છે. તપાસ દરમિયાન દંપતી વિદેશ ભાગી ગયાની પણ આશંકા વ્યક્ત કરવામાં આવી રહી છે, જેને ધ્યાનમાં રાખીને તપાસ વધુ તેજ કરવામાં આવી છે.
પ્રાથમિક તપાસમાં અનેક વેપારીઓના કરોડો રૂપિયાના નાણાં ફસાયા હોવાનું સામે આવ્યું છે. CID ક્રાઇમે સમગ્ર નાણાકીય વ્યવહારો, બેંક ટ્રાન્ઝેક્શન અને કંપનીના દસ્તાવેજોની તપાસ શરૂ કરી છે. આગામી દિવસોમાં વધુ ખુલાસા થવાની શક્યતા વ્યક્ત કરવામાં આવી રહી છે.