ગાંધીનગર જિલ્લામાં ભાડૂઆતો, વ્યવસાયિક એકમો અને મોલના માલિકો માટે પોલીસ વેરીફિકેશન ફરજિયાત

સમગ્ર ગાંધીનગર જિલ્લાના ભૌગોલિક વિસ્તારમાં સુરક્ષા અને કાયદો-વ્યવસ્થાની સુદ્રઢ જાળવણી માટે એક અગત્યનું જાહેરનામું બહાર પાડવામાં આવ્યું છે. કાયદો-વ્યવસ્થાની જાળવણી અને સુરક્ષાના હેતુથી જિલ્લા મેજિસ્ટ્રેટશ્રી ગાંધીનગર દ્વારા મહત્વનો આદેશ જાહેર કરાયો છે. આ જાહેરનામા અનુસાર, જિલ્લામાં કોઈપણ મકાનમાલિક, દુકાનમાલિક, શોપિંગ મોલ કે ઔદ્યોગિક એકમના સંચાલકો જ્યારે પોતાની મિલકત ભાડે આપે, ત્યારે સંબંધિત પોલીસ સ્ટેશનમાં તેની વિગતો પૂરી પાડવી કાયદેસર રીતે ફરજિયાત રહેશે. જાહેરનામાનો ભંગ કરનાર વ્યક્તિ સામે કાયદેસરની શિક્ષાત્મક કાર્યવાહી કરવામાં આવશે.
તાજેતરમાં તેમજ ભૂતકાળમાં બનેલી ઘટનાઓ અને ગુપ્તચર એજન્સીઓના અહેવાલોને ધ્યાને લેતા, અસામાજિક અને ત્રાસવાદી તત્વો ઓળખ છુપાવીને રહેણાંક વિસ્તારો, દુકાનો, ઓફિસો કે વ્યવસાયિક ક્ષેત્રો ભાડે મેળવીને આશ્રય લેતા હોય છે. આગામી સમયમાં લોકસભાની સામાન્ય ચૂંટણીઓ, વિવિધ તહેવારો તેમજ દેશના વરિષ્ઠ મહાનુભાવોની મુલાકાતો યોજાનાર છે, જેને ધ્યાનમાં રાખીને જાહેર સુરક્ષાને કોઈ આંચ ન આવે તે માટે આ આગોતરા નિયંત્રણો લાદવામાં આવ્યા છે.

આ જાહેરનામાના મુખ્ય નિયમો અનુસાર કોઈપણ વ્યક્તિ જ્યારે પોતાની માલિકીનું મકાન, દુકાન, ઓફિસ, શોપિંગ મોલ કે ઔદ્યોગિક એકમ ભાડે આપે, ત્યારે તેની વિગતવાર માહિતી ૧૫ દિવસમાં જે-તે વિસ્તારના સંબંધિત પોલીસ સ્ટેશનને આપવાની રહેશે. મિલકત ભાડે આપતી વખતે પોલીસ સ્ટેશનમાં જમા કરાવવાના પત્રકમાં મકાન, દુકાન, ઓફિસ કે શોપિંગ મોલની વિગત અને તે કયા વિસ્તારમાં આવેલ છે તેની માહિતી આપવાની રહેશે. આ ઉપરાંત મિલકતના મૂળ માલિકનું નામ અને સરનામું, મિલકત ક્યારથી અને કેટલા સમય માટે ભાડે આપવામાં આવી છે તેની વિગત, તેમજ ભાડે રહેનાર તમામ વ્યક્તિઓના પૂરા નામ, સરનામાં અને મોબાઈલ નંબર દર્શાવવાના રહેશે. ભાડૂઆતની ઓળખ આપનાર દલાલ એટલે કે એજન્ટની પણ જવાબદારી નક્કી કરવામાં આવી છે, જે અંતર્ગત એજન્ટે પણ ભાડૂઆતની પૂરતી ઓળખ મેળવી તેનું નામ અને સરનામું પોલીસ સ્ટેશનને આપવાનું રહેશે.આ જાહેરનામું તા.૧૫/૦૭/૨૦૨૬ થી ૧૨/૦૯/૨૦૨૬ સુધી, સમગ્ર ગાંધીનગર જિલ્લામાં અમલી રહેશે.