ભારે વરસાદની આગાહીને પગલે અમદાવાદમાં આવતીકાલે શાળા-કોલેજોમાં રજા જાહેર

અમદાવાદ શહેરમાં ભારે વરસાદની આગાહીને ધ્યાનમાં રાખીને જિલ્લા શિક્ષણાધિકારી, અમદાવાદ શહેર (પૂર્વ) દ્વારા તા.31 જુલાઈ, 2026 (શુક્રવાર)ના રોજ તમામ સરકારી, અનુદાનિત તથા સ્વનિર્ભર પ્રાથમિક, માધ્યમિક, ઉચ્ચતર માધ્યમિક શાળાઓ તેમજ કોલેજોમાં રજા જાહેર કરવામાં આવી છે. વિદ્યાર્થીઓની સુરક્ષા અને આરોગ્યને સર્વોચ્ચ પ્રાથમિકતા આપીને આ નિર્ણય લેવામાં આવ્યો છે. જિલ્લા શિક્ષણાધિકારીએ તમામ શૈક્ષણિક સંસ્થાઓને સૂચનાનું કડક પાલન કરવા જણાવ્યું છે તેમજ વિદ્યાર્થીઓ અને વાલીઓને આ અંગે સમયસર જાણ કરવાની સૂચના આપવામાં આવી છે.

આ તરફ રાજ્યના રાહત કમિશ્નરે પણ ભારે વરસાદની સંભાવનાને ધ્યાનમાં રાખીને નાગરિકોને સાવચેત રહેવાની અપીલ કરી છે. ખાસ કરીને કોઈ અગત્યનું કામ ન હોય તો ઘરની બહાર નીકળવાનું ટાળવા, પાણી ભરાયેલા રસ્તાઓથી દૂર રહેવા અને વીજળી પડવાની સ્થિતિમાં ખુલ્લા સ્થળોએ ન જવા સૂચના આપવામાં આવી છે.  પ્રશાસને લોકોને અફવાઓથી દૂર રહીને માત્ર જિલ્લા વહીવટીતંત્ર અને હવામાન વિભાગ દ્વારા જાહેર કરવામાં આવતી અધિકૃત સૂચનાઓ પર જ વિશ્વાસ રાખવા અપીલ કરી છે.