અમદાવાદ બાદ હવે ગાંધીનગરમાં પણ શાળા-કોલેજોમાં આવતીકાલે રજા જાહેર

ભારે વરસાદની આગાહીને પગલે અમદાવાદ બાદ હવે ગાંધીનગર જિલ્લામાં પણ તા. 31 જુલાઈ, 2026 (શુક્રવાર) ના રોજ તમામ સરકારી, અનુદાનિત અને સ્વનિર્ભર પ્રાથમિક, માધ્યમિક તથા ઉચ્ચતર માધ્યમિક શાળાઓમાં રજા જાહેર કરવામાં આવી છે. જિલ્લા શિક્ષણાધિકારી, ગાંધીનગર દ્વારા જાહેર કરાયેલી સૂચના મુજબ હવામાન વિભાગની ભારે વરસાદની આગાહીને ધ્યાનમાં રાખીને વિદ્યાર્થીઓની સુરક્ષા અને આરોગ્યને સર્વોચ્ચ પ્રાથમિકતા આપતાં આ નિર્ણય લેવામાં આવ્યો છે. આ દિવસે તમામ શૈક્ષણિક પ્રવૃત્તિઓ સંપૂર્ણપણે બંધ રહેશે.

શાળા સંચાલકોને વાલીઓ અને વિદ્યાર્થીઓ સુધી WhatsApp, SMS, ફોન અથવા અન્ય ઉપલબ્ધ માધ્યમો દ્વારા તાત્કાલિક જાણ કરવાની સૂચના આપવામાં આવી છે. આગામી દિવસોની સ્થિતિ અંગેનો નિર્ણય જિલ્લા વહીવટી તંત્ર દ્વારા પરિસ્થિતિની સમીક્ષા બાદ જાહેર કરવામાં આવશે. રાજ્યના રાહત કમિશ્નરે પણ નાગરિકોને સાવચેત રહેવાની અપીલ કરી છે. જરૂરી કામ સિવાય ઘરની બહાર ન નીકળવા, પાણી ભરાયેલા વિસ્તારો અને જોખમી સ્થળોથી દૂર રહેવા તેમજ માત્ર જિલ્લા વહીવટી તંત્ર અને હવામાન વિભાગની અધિકૃત સૂચનાઓનું જ પાલન કરવા અનુરોધ કરવામાં આવ્યો છે.