ગાંધીનગર કલેક્ટર રવિન્દ્ર ખતાલેની નાંદોલી ગામમાં રૂબરૂ મુલાકાત, વરસાદી સ્થિતિનો મેળવ્યો ચિતાર
વર્તમાન સમયમાં પડી રહેલા ભારે વરસાદની સ્થિતિને ધ્યાને રાખીને ગાંધીનગર જિલ્લા વહીવટી તંત્ર પૂર્ણપણે એલર્ટ મોડમાં કામગીરી કરી રહ્યું છે. નાગરિકોને વરસાદના કારણે કોઈ હાલાકી કે મુશ્કેલીનો સામનો ન કરવો પડે તે માટે ગાંધીનગર જિલ્લા કલેક્ટરશ્રી રવિન્દ્ર ખતાલે અને જિલ્લા વિકાસ અધિકારીશ્રી દિગંત બ્રહ્મભટ્ટ દ્વારા સ્થળ પર પહોંચીને ગ્રાઉન્ડ વિઝિટ હાથ ધરવામાં આવી હતી.
કલેક્ટરશ્રી રવિન્દ્ર ખતાલે અને જિલ્લા વિકાસ અધિકારીશ્રી દિગંત બ્રહ્મભટ્ટે ઉચ્ચ અધિકારીઓના કાફલા સાથે કલોલ તાલુકાના નાંદોલી ગામની રૂબરૂ મુલાકાત લીધી હતી. આ મુલાકાત દરમિયાન તેમણે ગામમાં વરસાદી પાણીના નિકાલની વ્યવસ્થા, રસ્તાઓની સ્થિતિ અને અસરગ્રસ્ત વિસ્તારોનું પ્રત્યક્ષ નિરીક્ષણ કર્યું હતું.
સ્થળ પર ઉપસ્થિત અન્ય અધિકારીશ્રી તેમજ સંબંધિત વિભાગના અધિકારીઓને કલેક્ટરશ્રી દ્વારા જરૂરી તાકીદના માર્ગદર્શન અને સૂચનાઓ આપવામાં આવી હતી. તેમણે જણાવ્યું હતું કે, વરસાદી સ્થિતિમાં ગ્રામજનોને પ્રાથમિક સુવિધાઓ મળી રહે અને કોઈ પણ પ્રકારની તકલીફ ન પડે તે માટે તમામ વિભાગોએ પરસ્પર સંકલન સાધીને કામગીરી કરવી. આ ઉપરાંત, નીચાણવાળા કે પાણી ભરાવાની શક્યતા ધરાવતા વિસ્તારો પર સતત મોનિટરિંગ રાખવા અને જરૂર જણાય ત્યાં તાત્કાલિક મદદ પહોંચાડવા માટે તંત્રને સજ્જ રહેવા જણાવાયું હતું.
