BISAG-N ખાતે KSVના 114 વિદ્યાર્થીઓની ત્રિ-દિવસીય ઇન્ડસ્ટ્રી વિઝિટ
ગાંધીનગર: કડી સર્વ વિશ્વવિદ્યાલય, કડી-ગાંધીનગર સંલગ્ન શ્રી માણેકલાલ એમ. પટેલ ઇન્સ્ટિટ્યૂટ ઓફ સાયન્સિસ એન્ડ રિસર્ચના M.Sc. IT અને B.Sc. CS તથા SVKM ઇન્સ્ટિટ્યૂટ ઓફ કમ્પ્યુટર સ્ટડીઝના BCAના વિદ્યાર્થીઓને ઔદ્યોગિક અને વ્યવહારુ જ્ઞાન પ્રાપ્ત થાય તે હેતુથી ગાંધીનગર સ્થિત BISAG-N (Bhaskaracharya National Institute for Space Applications and Geo-informatics) ખાતે તા. 10થી 12 ઓગસ્ટ, 2026 દરમિયાન ત્રિ-દિવસીય ઇન્ડસ્ટ્રી વિઝિટનું આયોજન કરવામાં આવ્યું હતું. આ મુલાકાતમાં M.Sc. (IT) સેમેસ્ટર-3, B.Sc. (CS) સેમેસ્ટર-5 અને BCA સેમેસ્ટર-5ના કુલ 114 વિદ્યાર્થીઓએ ઉત્સાહપૂર્વક ભાગ લીધો હતો.
ઇન્ડસ્ટ્રી વિઝિટ દરમિયાન વિદ્યાર્થીઓને BISAG-Nની કામગીરી તેમજ વિવિધ ટેક્નોલોજી આધારિત પ્રવૃત્તિઓ અંગે પ્રાયોગિક માર્ગદર્શન આપવામાં આવ્યું હતું. વિદ્યાર્થીઓએ GIS, Remote Sensing, Geo-informatics, Satellite Communication અને Space Technologyના વાસ્તવિક જીવનમાં થતા ઉપયોગો અંગે માહિતી મેળવી હતી. ઉપરાંત, Satellite Data, Data Analytics, AI/ML તથા આધુનિક ડિજિટલ ટેક્નોલોજીનો સરકારી અને સામાજિક ક્ષેત્રે કેવી રીતે ઉપયોગ થાય છે તે અંગે પણ વિદ્યાર્થીઓને પ્રત્યક્ષ સમજ આપવામાં આવી હતી.
આ મુલાકાતનો મુખ્ય ઉદ્દેશ વિદ્યાર્થીઓ દ્વારા વર્ગખંડમાં પ્રાપ્ત કરવામાં આવેલા સૈદ્ધાંતિક જ્ઞાનને ઔદ્યોગિક તથા વાસ્તવિક પરિસ્થિતિ સાથે જોડવાનો હતો. મુલાકાત દરમિયાન વિદ્યાર્થીઓને ટેક્નોલોજી આધારિત સમસ્યાઓના ઉકેલ, આધુનિક ટેક્નોલોજીકલ ઇન્ફ્રાસ્ટ્રક્ચર અને ઉદ્યોગની કાર્યપદ્ધતિ અંગે માર્ગદર્શન મળ્યું હતું. સાથે જ IT, Space Technology, GIS, Data Science અને Data Analytics જેવા ઉભરતા ક્ષેત્રોમાં ઉપલબ્ધ કારકિર્દીની તકો અંગે પણ મહત્વપૂર્ણ માહિતી પ્રાપ્ત થઈ હતી. આ શૈક્ષણિક પહેલનું આયોજન કડી સર્વ વિશ્વવિદ્યાલયના પ્રમુખશ્રી વલ્લભભાઈ એમ. પટેલના માર્ગદર્શન હેઠળ કરવામાં આવ્યું હતું. કાર્યક્રમનું સમગ્ર માર્ગદર્શન પ્રિન્સિપાલ (I/C) ડૉ. શિવાની એ. ત્રિવેદીના નેતૃત્વ હેઠળ કરવામાં આવ્યું હતું. ઇન્ડસ્ટ્રી વિઝિટના આયોજન અને સંકલનમાં ડૉ. કિંજલ શેઠ, શ્રી હેનિલ પીઠડીયા અને શ્રી જિજ્ઞેશ સેંજલિયા તથા ફેકલ્ટી કોઓર્ડિનેટર્સ ડૉ. કિંજલ શેઠ, શ્રીમતી સ્નેહલ રિન્દાણી અને શ્રી બલજીત કૌરએ મહત્વપૂર્ણ ભૂમિકા ભજવી હતી.
આ ત્રિ-દિવસીય ઇન્ડસ્ટ્રી વિઝિટના પરિણામે વિદ્યાર્થીઓને અભ્યાસક્રમમાં મેળવેલા જ્ઞાનને વાસ્તવિક ઔદ્યોગિક પરિસ્થિતિ સાથે જોડવાનો પ્રત્યક્ષ અનુભવ પ્રાપ્ત થયો હતો. સાથે જ નવીન ટેક્નોલોજી, સંશોધન, સમસ્યા ઉકેલવાની ક્ષમતા તથા ટેક્નોલોજી આધારિત કારકિર્દી અંગે તેમની જાગૃતિમાં વધારો થયો હતો. કડી સર્વ વિશ્વવિદ્યાલય દ્વારા વિદ્યાર્થીઓને ઉદ્યોગલક્ષી, ટેક્નોલોજી-સજ્જ અને ભવિષ્યલક્ષી બનાવવાના હેતુથી આયોજિત આ ઇન્ડસ્ટ્રી વિઝિટ શૈક્ષણિક અને વ્યવહારુ જ્ઞાન વચ્ચેનું અંતર ઘટાડવામાં મહત્વપૂર્ણ સાબિત થઈ હતી.
