ગાંધીનગર જિલ્લામાં તા. ૩૦/૦૮/૨૦૨૬ના રોજ યોજાશે ‘NEET (PG)’ તથા ‘GPSC’ ની પરીક્ષા
ગાંધીનગર જિલ્લામાં આગામી તા. ૩૦/૦૮/૨૦૨૬ રવિવાર ના રોજ કેન્દ્ર સરકારની નેશનલ ટેસ્ટીંગ એજન્સી દ્વારા ‘NEET (PG)-2026’ તથા ગુજરાત જાહેર સેવા આયોગ (GPSC) દ્વારા વિવિધ સંવર્ગની પ્રાથમિક કસોટીઓ યોજાનાર છે. આ બંને પરીક્ષાઓ શાંતિપૂર્ણ અને ગેરરીતિ મુક્ત વાતાવરણમાં યોજાય તે હેતુથી ગાંધીનગર જિલ્લા મેજિસ્ટ્રેટશ્રી રવિન્દ્ર ખતાલે દ્વારા જાહેરનામું પ્રસિદ્ધ કરવામાં આવ્યું છે.
NEET (PG)-2026: સવારે ૦૯:૦૦ થી ૧૨:૩૦ કલાક સુધી તથા GPSC પ્રાથમિક કસોટી અંતર્ગત બાળ વિકાસ અધિકારી/નાયબ નિયામક (વર્ગ-૧) અને મદદનીશ ઇજનેર (સિવિલ, વર્ગ-૨) ની પરીક્ષા સવારે ૧૧:૦૦ થી ૦૧:૦૦ કલાક દરમિયાન જિલ્લાના ૪૩ કેન્દ્રો પર યોજાશે. આ જાહેરનામા મુજબ ઉક્ત પરીક્ષાઓના સમય દરમિયાન પરીક્ષા કેન્દ્રોની ૧૦૦ મીટરની ત્રિજ્યામાં કેટલાક કાર્યો પર પ્રતિબંધ રહેશે.
જેમાં પરીક્ષા કેન્દ્રોની ચારેતરફ ૧૦૦ મીટરની ત્રિજ્યામાં બિનઅધિકૃત વ્યક્તિઓએ પ્રવેશ કરવો નહીં કે ચારથી વધુ લોકોએ એકઠા થવું નહીં. ૧૦૦ મીટરના વિસ્તારમાં આવેલા તમામ ઝેરોક્ષ સેન્ટરો કે દુકાનો બંધ રાખવાની રહેશે તેમજ ઝેરોક્ષ/ફેક્સ મશીનનો ઉપયોગ કરી શકાશે નહીં. પરીક્ષા સ્થળે મોબાઈલ ફોન, પેજર, સ્માર્ટ વોચ, ઈલેક્ટ્રિક ડાયરી કે અન્ય કોઈપણ ઈલેક્ટ્રોનિક ઉપકરણો લઈ જવા પર સંપૂર્ણ પ્રતિબંધ છે. પરીક્ષા કેન્દ્રોની આસપાસ મોટા અવાજે લાઉડ સ્પીકર વગાડવા પર મનાઈ ફરમાવવામાં આવી છે.
કોઈપણ પ્રકારના હથિયારો, પુસ્તકો કે કાપલીઓ પરીક્ષા સ્થળે લઈ જવા નહીં. પ્રતિબંધિત વિસ્તારમાં પાન-બીડી કે ચા-પાણીના ગલ્લાઓ ચાલુ રાખી શકાશે નહીં.
જાહેર વાહન વ્યવહાર અવરોધાય તે રીતે વાહનો ઉભા રાખવા કે પાર્ક કરવા નહીં. ઉલ્લેખનિય છે કે,આ હુકમ પરીક્ષાની ફરજ પરના પોલીસ, હોમગાર્ડ અને અન્ય અધિકૃત કર્મચારીઓને લાગુ પડશે નહીં. તથા જાહેરનામાનો ભંગ કરનાર કોઈપણ વ્યક્તિ સામે શિક્ષાત્મક કાર્યવાહી કરવામાં આવશે.
