મેયરે જવાબ રજુ નહીં કરતાં ૧૩ ઓકટોબરની મુદ્દત પડી

ગાંધીનગર,ગુરુવાર

ગાંધીનગર મહાનગરપાલિકાની ચૂંટણી બાદ ભાજપ અને કોંગ્રેસને ૧૬-૧૬ બેઠકો મળી હતી. ત્યારે કોંગ્રેસના કોર્પોરેટર પ્રવિણ પટેલ પક્ષપલ્ટો કરીને ભાજપમાં બેસી ગયા હતા અને મેયરપદુ મેળવી લીધું હતું. ત્યારે  કોંગ્રેસના પૂર્વ વિરોધપક્ષના નેતાએ નામો નિર્દિષ્ટ અધિકારી સમક્ષ મેયર પ્રવિણ પટેલને પક્ષાંતર ધારા હેઠળ તેમનું સભ્યપદ રદ કરવા માટે પીટીશન દાખલ કરી હતી. જેની આજે સુનાવણી યોજાઈ હતી પરંતુ મેયરે જવાબ નહીં રજૂ કરતાં હવે તા.૧૩ ઓકટોબરની મુદત પડી છે.

ગાંધીનગરની મહાનગરપાલિકાની યોજાયેલી ચૂંટણી મેયરની ચૂંટણી યોજવા માટે મળેલી સામાન્ય સભાના કલાકો પહેલા જ કોંગ્રેસના કોર્પોરેટર પ્રવિણ પટેલ પક્ષપલ્ટો કરીને ભાજપમાં ભળી ગયા હતા અને મેયરપદ મેળવી લીધું હતું. જેથી કોંગ્રેસ દ્વારા મેયરને નોટિસ ફટકારી ખુલાસો પુછયો હતો.

જો કે નોટિસની પંદર દિવસની મુદત પુરી થવા છતાં મેયર દ્વારા કોંગ્રેસને કોઈ ખુલાસો કરવામાં આવ્યો નહોતો. ત્યારબાદ કોંગ્રેસ દ્વારા અવારનવાર પ્રવિણ પટેલ ઉપર હુમલાઓ પણ કરવામાં આવ્યા હતા અને છેવટે કંટાળીને મેયરે પોલીસ રક્ષણ મેળવવાની ફરજ પડી હતી.

ત્યારે ગાંધીનગર મહાનગરપાલિકાના વિરોધપક્ષના પૂર્વ નેતા અને વોર્ડ નં.ર ના કોર્પોરેટર શૈલેન્દ્રસિંહ બિહોલાએ સચિવાલય સ્થિત નામોનિર્દિષ્ટ અધિકારી સમક્ષ પક્ષાંતરધારાની કલમ-૩ મુજબ પક્ષ પલટો કરનાર અને કોંગ્રેસના વ્હીપને ગ્રાહ્ય નહીં રાખનાર કોર્પોરેટર પ્રવિણ પટેલનું સભ્ય પદ રદ કરવા માટે પીટીશન દાખલ કરી હતી. જેની સુનાવણી આજે યોજાઈ હતી.

પરંતુ મેયરના વકીલ દ્વારા કોઈ જવાબ રજૂ કરવામાં આવ્યો નહોતો. જેથી શૈલેન્દ્રસિંહે આ બાબતનો વિરોધ નોંધાવ્યો હતો. ત્યારે નામોનિર્દિષ્ટ અધિકારી વી.પી.પટેલે આગામી તા.૧૩ ઓકટોબરે મુદત આપી છે અને મેયરને જવાબ રજૂ કરવા સૂચના પણ આપી છે.