ગાંધીનગરનું સુપ્રસિદ્ધ અક્ષરધામ મંદિર 12 જુલાઈથી પુન: ખુલ્લુ મુકાશે

કોરોનાની વૈશ્વિક મહામારીના કારણે 9 એપ્રિલ થી બંધ કરી દેવામાં આવેલ સુપ્રસિધ્ધ અક્ષરધામ મંદિરના દ્વાર તા. 12 મી જુલાઈ સોમવાર નાં રોજ રથયાત્રાના પવિત્ર દિવસથી સવારે 10 કલાકથી સાંજના 7.30 કલાક સુધી ખુલ્લા કરી દેવામાં આવશે. ત્યારે સોમવારથી ભાવિક ભક્તો દર્શનની સાથે વોટરશો નો પણ આંનદ માણી શકશે.કોરોના ની મહામારીના પગલે સરકાર નાં આદેશ મુજબ રાજ્યભરના નાના મોટા મંદિરો દર્શનાર્થી ઓ માટે બંધ કરી દેવામાં આવ્યા હતા. જે અન્વયે ગાંધીનગર નું સુપ્રસિદ્ધ અક્ષરધામ મંદિર પણ ગત તા. 9 એપ્રિલથી જાહેર જનતા માટે બંધ કરી દેવામાં આવ્યું હતું. સમય જતાં કોરોના નું સંક્રમણ ઘટવા લાગતા સરકારની ગાઈડ લાઈન મુજબ મંદિરો ખોલવાની પરવાનગી આપવામાં આવી હતી જેનાં પગલે ગાંધીનગરનાં વાસણીયા મહાદેવ, ધોળેશ્વર મહાદેવ, ગાયત્રી મંદિર, ડભોડા હનુમાન મંદિર સહિતના મંદિરો કોરોના ગાઈડ લાઈનના ચુસ્ત અમલ સાથે ખોલી દેવામાં આવ્યા હતા. પરંતું સુપ્રસિદ્ધ અક્ષર ધામ મંદિરનાં દ્વાર બંધ રાખવાનો મંદિર પ્રશાસન દ્વારા નિર્ણય લેવામાં આવ્યો હતો. ત્યારે અષાઢી બીજ ને સોમવારના રોજ રથયાત્રાના નાં પાવન દિનથી અક્ષરધામ મંદિર પણ ભાવિક ભક્તો માટે ખુલ્લું મુકવામાં આવનાર છે

આ અંગે મંદિર પ્રશાસન દ્વારા કહેવામાં આવ્યું છે કે અષાઢી બીજથી દર્શનાર્થીઓ અને ભાવિક ભક્તો અક્ષરધામની ભવ્ય સાંસ્કૃતિક પરિસરના દર્શન હવેથી કરી શકશે. મંદિર દરરોજ સવારે 10 કલાકથી સાંજના 7.30 કલાક સુધી ખુલ્લુ રહેશે. અક્ષરધામ મંદિરના દર્શન, પ્રદર્શન ખંડો, બુકસ્ટોલ, ગેમ્સ, પ્રેમવતી રેસ્ટોરન્ટ અને દરરોજ સાંજે 7:45 કલાકે યોજાતા વોટરશોને પણ દર્શનાર્થીઓ નિહાળી શકશે. જો કે નીલકંઠ અભિષેક પૂજા વિધિ હાલ પૂરતુ બંધ રહેશે.