કેન્દ્ર સરકારે સુપ્રીમ કોર્ટમાં જણાવ્યું હતું કે યુક્રેનથી પરત આવેલા વિદ્યાર્થીઓને ભારતની કોલેજોમાં પ્રવેશ મળશે નહીં

યુદ્ધ દરમિયાન યુક્રેનથી પરત ફરેલા ભારતીય વિદ્યાર્થીઓએ વધુ એમબીબીએસ અભ્યાસ માટે સુપ્રીમ કોર્ટમાં અરજી કરી હતી. જેમાં તેમની માંગણી હતી કે અમને ભારતની કોઈપણ કોલેજ કે યુનિવર્સિટીમાં પ્રવેશ આપવામાં આવે. જેથી કરીને આગળનો અભ્યાસ પૂર્ણ કરી શકીએ. જેના જવાબમાં કેન્દ્ર સરકારે ગુરુવારે એફિડેવિટમાં પોતાનો પક્ષ રજૂ કર્યો અને કહ્યું કે આ સંજોગોમાં ભારતની કોઈપણ મેડિકલ કોલેજમાં કોઈ વિદ્યાર્થીને પ્રવેશ આપવાની જોગવાઈ નથી. જો કે આ મામલે આગામી સુનાવણી શુક્રવારે સુપ્રીમ કોર્ટમાં થશે.

 રશિયા અને યુક્રેન વચ્ચે ચાલી રહેલા યુદ્ધ દરમિયાન મોટી સંખ્યામાં ભારતીય વિદ્યાર્થીઓ યુક્રેનથી પરત ફર્યા હતા. જેમને અધવચ્ચે છોડીને ભારત પરત ફરવું પડ્યું હતું. તેણે ભારતીય મેડિકલ કોલેજોમાં એડમિશન મેળવવા અને પોતાનું અધૂરું શિક્ષણ પૂરું કરવા માટે સુપ્રીમ કોર્ટમાં અલગ-અલગ અરજીઓ કરી હતી, જેની સુનાવણી જસ્ટિસ હેમંત ગુપ્તાની બેન્ચમાં ચાલી રહી હતી. જેમાં સુપ્રીમ કોર્ટે આ મુદ્દે કેન્દ્ર સરકાર પાસે જવાબ માંગ્યો હતો.ગુરુવારે કેન્દ્ર સરકારે વિદ્યાર્થીઓની અલગ-અલગ અરજીઓના જવાબમાં કોર્ટમાં એફિડેવિટ રજૂ કરી હતી. જેમાં એવું કહેવામાં આવ્યું હતું કે NMC (નેશનલ મેડિકલ કમિશન) વિદેશમાં અભ્યાસ કરતા કોઈપણ વિદ્યાર્થીને કોઈપણ ભારતીય મેડિકલ કોલેજમાં એડમિશન લેવાની મંજૂરી આપતું નથી.

 કેન્દ્રએ એફિડેવિટમાં એમ પણ કહ્યું કે આ વિદ્યાર્થીઓને ઈન્ડિયન મેડિકલ કાઉન્સિલ એક્ટ 1956 અને નેશનલ મેડિકલ કમિશન એક્ટ 2019 મુજબ કોઈપણ ભારતીય મેડિકલ કૉલેજમાં પ્રવેશ આપી શકાય નહીં.જો કે, કેન્દ્રએ એમ પણ કહ્યું હતું કે, કેન્દ્રએ વિદેશ મંત્રાલયના માર્ગદર્શન હેઠળ 6 સપ્ટેમ્બરે એવા વિદ્યાર્થીઓ માટે જાહેર નોટિસ બહાર પાડી હતી જેઓ એમબીબીએસ પૂર્ણ કરી શક્યા નથી. જેમાં કહેવામાં આવ્યું છે કે યુક્રેનની મેડિકલ કોલેજોની પરવાનગીથી વિદ્યાર્થીઓ અન્ય દેશોની મેડિકલ સંસ્થાઓમાં બાકીના કોર્સ પૂરા કરી શકે છે.