ફૂડ કોર્ટમાં વધારાની જગ્યાનું દબાણ તોડવાનો નિર્ણય

પાટનગરના રહીશોમાં લોકપ્રિય બની ગયેલા પાંચમા સર્કલ પાસે ખાણીપીણીની દુકાનો માટે ફાળવવામાં આવેલી વધારાની જગ્યામાં દુકાનોના લાભાર્થીઓ દ્વારા કરવામાં આવતા દબાણને આખરે તોડી પાડવાનો નિર્ણય લેવાયો છે. સરકારી તંત્ર દ્વારા રસોઈ બનાવવા માટે કરાયેલા બાંધકામ ઉપરાંત ગ્રાહકોને બેસવા માટે 600 ચોરસ ફૂટ જગ્યા આપવામાં આવી હતી, પરંતુ તે પણ દબાણ બાબતે ચર્ચા બાદ દૂર કરવા સૂચના આપવામાં આવી છે.

લોકપ્રિય ખાણી-પીણીના બજારને ગંદકીમુક્ત અને સુવિધા-અનુકૂળ બનાવવા માટે ફૂડ કોર્ટના નામે સરકારી ખર્ચે બાંધવામાં આવેલી 96 દુકાનોમાંથી 84 દુકાનોમાં મિની-રેસ્ટોરન્ટનો ધમધમાટ છે. પાટનગર યોજના વિભાગ દ્વારા અહીં રસ્તા, વીજળી, પાણી, સ્ટ્રીટ લાઇટ, ગટરના નિકાલ અને ગેસ પાઇપલાઇન સહિતની સુવિધાઓ ઉભી કરવામાં આવી છે. આ સાથે મહાનગર પાલિકા દ્વારા દરરોજ કચરો ઉપાડવાની વ્યવસ્થા કરવામાં આવી છે. ઉક્ત દુકાનોની ફાળવણી આ વિસ્તારમાં ખાણી-પીણીનો ધંધો કરતા નાના વેપારીઓને ડ્રો પધ્ધતિથી ખૂબ જ નજીવા ભાડામાં ફાળવવામાં આવી છે. પરંતુ અઢળક કમાણી કરવા છતાં આ વેપારીઓ નિયમિત ભાડું ચૂકવતા નથી. વધુમાં, 600 ફૂટના નિયુક્ત બેઠક વિસ્તારની બહારના વિસ્તારમાં શેડ બાંધવામાં આવ્યા છે. જેના કારણે ગ્રાહકોને કોઈ રાહત નથી. આ સાથે સત્તાવાર સૂત્રોએ એમ પણ જણાવ્યું કે આવી સ્થિતિના કારણે ગંદકી પણ ફેલાતી રહે છે અને આંતરિક વિખવાદ પણ થતો રહે છે.