સેટેલાઇટ લોન્ચિંગ વખતે કાઉન્ટડાઉન કરનાર ઇસરોના મહિલા વૈજ્ઞાનિક વલારમથીનું હાર્ટ એટેકથી નિધન

ઇસરોના મહિલા વૈજ્ઞાનિક વલારમથીનું હાર્ટ એટેકથી નિધનના સમાચાર હાલ મળી રહ્યા છે.તેમણે દેશની અવકાશ સંશોધન યાત્રામાં મહત્વની ભૂમિકા ભજવી હતી. ચંદ્રયાન-3 હોય કે ઈસરોના કોઈપણ સેટેલાઇટ લોન્ચિંગ હોય એ પહેલાના કાઉન્ટડાઉન કરવામાં આવે છે એમાં અવાજ આપનાર મહિલા વૈજ્ઞાનિક વલારમથીનું હાર્ટ એટેકથી નિધન થયું છે. તેમને છેલ્લે 30 જુલાઈના રોજ PSLV-C56 મિશન માટે કાઉન્ટડાઉન કરતા સાંભળવામાં આવ્યા હતા. ચેન્નઈમાં જન્મેલા અને ઉછરેલા વલારમથી નાનપણથી જ વિજ્ઞાન અને ટેક્નોલોજી પ્રત્યે જુસ્સાદાર હતા. તેઓએ એન્જિનિયરિંગનું શિક્ષણ મેળવ્યું અને નાની ઉંમરે ISROમાં જોડાઈ ગયા હતા. વલારમથી તેમના સાથીદારોમાં ‘મૅમ’ તરીકે પણ ઓળખાતા હતા. તેઓ ઘણા વર્ષોથી ISRO ટીમનો અભિન્ન ભાગ હતા. આત્મવિશ્વાસથી ભરપૂર તેમના વિશિષ્ટ અવાજે ISROના ઘણા સફળ રોકેટ પ્રક્ષેપણને માર્ગદર્શન આપ્યું છે. 

મહિલા વૈજ્ઞાનિક વલારમથીના નિધન પર ISROએ દુઃખ વ્યક્ત કર્યું છે અને કહ્યું કે રોકેટ પ્રક્ષેપણ કાઉન્ટડાઉન પાછળનો પ્રતિષ્ઠિત મહિલા અવાજ શ્રી હરિકોટાના ભવિષ્યના મિશનમાં સંભળાશે નહીં.  વલારમથીના નિધનથી અવાજ અનંતકાળ માટે ઝાંખો પડી ગયો છે! શનિવાર સાંજે ચેન્નઈની એક હોસ્પિટલમાં હૃદયરોગના હુમલાથી મહિલા વૈજ્ઞાનિક વલારમતીનું અવસાન થયું હતું.