ભારત-પાકિસ્તાનની મેચ પહેલા અમદાવાદમાં રોમાંચ જમાવશે અરિજીત, સુખવિંદર અને શંકર મહાદેવન

વર્લ્ડ કપ 2023માં ભારત અને પાકિસ્તાન વચ્ચે શનિવારે અમદાવાદમાં મેચ રમાશે. વર્લ્ડ કપ 2023ની 12મી મેચ પહેલા સેલિબ્રેશન કરવામાં આવશે. ભારતીય ક્રિકેટ કંટ્રોલ બોર્ડે સોશિયલ મીડિયા મારફતે ભારત-પાકિસ્તાન મેચ પહેલા પ્રદર્શન કરી રહેલા કલાકારોની માહિતી આપી હતી. અમદાવાદના નરેન્દ્ર મોદી સ્ટેડિયમમાં રમાનાર આ ક્રિકેટ મેચની મજા માણવા દેશભરમાંથી 200થી વધારે વીવીઆઈપી હસ્તીઓ અમદાવાદ આવી રહી છે. આજથી VVIP નું અમદાવાદમાં આગમન શરૂ થઈ ગયું છે. આ મેચ પહેલા ભારતના ત્રણ મોટા કલાકારો પરફોર્મ કરશે. ચાહકો આ મેચની આતુરતાથી રાહ જોઈ રહ્યા છે. મળેલી જાણકારી અનુસાર બોલિવૂડના જાણીતા સિંગર અરિજીત સિંહ આ શોનો હિસ્સો રહેશે. અરિજીતની સાથે શંકર મહાદેવન અને સુખવિંદર સિંહ પણ પરફોર્મ કરશે.

આવતીકાલે એટલેકે, 14 ઓક્ટોબરને શનિવારના રોજ ભારત અને પાકિસ્તાન વચ્ચે ક્રિકેટ વર્લ્ડ કપનો રોમાંચક મુકાબલો થશે. BCCIએ X પર અરિજીત, શંકર મહાદેવન અને સુખવિંદરનો ફોટો શેર કર્યો છે. આ કલાકારો શનિવારે બપોરે 12.30 વાગ્યાથી પરફોર્મ કરશે. પ્રી-મેચ શોનું આયોજન નરેન્દ્ર મોદી સ્ટેડિયમમાં કરવામાં આવશે. ભારત-પાકિસ્તાન મેચ જોવા માટે દુનિયાભરમાંથી ચાહકો આવ્યા છે. આ મેચની ટિકિટો ઘણા સમય પહેલા વેચાઈ હતી. પાકિસ્તાનની ટીમ હયાત હોટલમાં રોકાઇ છે. અહીં પોલીસનો સઘન બંદોબસ્ત ગોઠવવામાં આવ્યો છે. હોટલમાં આવનાર દરેક મુલાકાતીઓની નોંધણી કરવામાં આવી રહી છે. બુધવારે રાતે પોલીસ કમિશનરે પણ હોટલની મુલાકાત લીધી હતી.