પ્રજાસત્તાક દિનની ગાંધીનગર જિલ્લા કક્ષાની ઉજવણી દહેગામ ખાતે કરાશે
ગાંધીનગર જિલ્લા કક્ષાના પ્રજાસત્તાક પર્વની ઉજવણી દહેગામ ખાતે કરવામાં આવશે. રાષ્ટ્રીય પર્વની ઉજવણીના સુચારું આયોજન અર્થે જિલ્લા કલેક્ટર હિતેષ કોયાના અધ્યક્ષ સ્થાને બેઠક યોજાઇ હતી. આ બેઠકમાં જિલ્લા કક્ષાના પ્રજાસત્તાક પર્વની ઉજવણી દહેગામ ખાતે કરવાનું નક્કી કરવામાં આવ્યું હતું. આ કાર્યક્રમના સ્થળે પાર્કિંગ વ્યવસ્થા, પીવાના પાણીની સુવિધા, સુશોભન જેવી વિવિઘ બાબતોની સમીક્ષા કરવામાં આવી હતી.
રાષ્ટ્રીય પર્વની ઉજવણી નિમિત્તે પોલીસ જવાનો અને હોમગાર્ડના જવાન દ્વારા પરેડ રજૂ કરવામાં આવશે. તેની સાથે સાથે વિવિધ ક્ષેત્રે શ્રેષ્ઠ કામગીરી કરનાર કર્મયોગીઓનું સન્માન કરવામાં આવશે. જિલ્લાની વિવિઘ શાળાના વિઘાર્થીઓ દ્વારા સાંસ્કૃતિક કાર્યક્રમ યોજાશે. જિલ્લાની વિવિઘ કચેરીઓ દ્વારા પોતાના ટેબ્લોઝ પણ રજૂ કરવામાં આવશે.
પ્રજાસત્તાક પર્વના સુચારું આયોજન માટે મળેલી બેઠકમાં નિવાસી અધિક કલેકટર ડી.કે. બ્રહ્મભટ્ટ, ગાંધીનગર પ્રાંત અધિકારી બ્રિજેશ મીડિયા, જિલ્લા ગ્રામ વિકાસ એજન્સીના નિયામક જિજ્ઞાસા વેગડા સહિત સંબંધિત અધિકારી ઓ ઉપસ્થિત રહ્યા હતા.
