LPG સિલિન્ડરના ભાવ 100 રૂપિયાનો ઘટાડો, મહિલા દિવસ પર સરકારની ભેટ
આંતરરાષ્ટ્રીય મહિલા દિવસના અવસર પર વડાપ્રધાન નરેન્દ્ર મોદીએ મહિલાઓને મોટી ભેટ આપવાની જાહેરાત કરી છે. PM મોદીએ શુક્રવારે જાહેરાત કરી હતી કે તેમની ભારતીય જનતા પાર્ટી સરકારે LPG સિલિન્ડરની કિંમતોમાં 100 રૂપિયાનો ઘટાડો કરવાનો નિર્ણય લીધો છે. વડાપ્રધાન મોદીએ સોશિયલ મીડિયા પ્લેટફોર્મ એક્સ પર લખ્યું કે, ‘આનાથી નારી શક્તિના જીવનને વધુ સરળ બનાવવા સાથે કરોડો પરિવાર પરનો આર્થિક ભાર પણ ઘટશે. આ પગલું પર્યાવરણ સંરક્ષણમાં પણ મદદરૂપ થશે, જેનાથી સમગ્ર પરિવારના સ્વાસ્થ્યમાં સુધારો થશે.પીએમ મોદીનો આ નિર્ણય દેશભરના તમામ સિલિન્ડર ધારકોને લાગુ પડશે. કેન્દ્રીય કેબિનેટે ગઈકાલે ઉજ્જવલા યોજના હેઠળ સિલિન્ડરની કિંમત પર 300 રૂપિયાનું ડિસ્કાઉન્ટ આગામી એક વર્ષ સુધી ચાલુ રાખવાનો નિર્ણય લીધો હતો. તે ઉપરાંત, તમામ સામાન્ય સિલિન્ડર ગ્રાહકો પર 100 રૂપિયા પ્રતિ સિલિન્ડરનું ડિસ્કાઉન્ટ લાગુ થશે. સરકારી ડેટા અનુસાર, દેશભરમાં લગભગ 32.5 કરોડ એલપીજી કનેક્શન છે. જેમાં પીએમ ઉજ્જવલા યોજના હેઠળ છેલ્લા 10 વર્ષમાં લગભગ 10.25 કરોડ સિલિન્ડર આપવામાં આવ્યા છે.
