લંડન ફેશન વીકમાં ભાગ લેવાના નામે ગાંધીનગરની મહિલા સાથે છેતરપિંડી

ગાંધીનગર: કુડાસણની એક મહિલા ફેશન કંપનીના માલિકને લંડન ફેશન શોમાં ભાગ લેવાની લાલચ આપીને ₹૩૨.૯૧ લાખની છેતરપિંડી કરવામાં આવી છે. આ મામલે ઈન્ફોસિટી પોલીસે દિલ્હીની એક મહિલા અને બે પુરુષો સામે ગુનો નોંધીને તપાસ શરૂ કરી છે. કુડાસણની ફ્લેપર-૬ ફેશન પ્રાઇવેટ લિમિટેડના સ્થાપક સોનલબેન દેસાઈએ પોલીસમાં ફરિયાદ નોંધાવી છે. ગત મે મહિનામાં તેઓ એક ઑનલાઇન એપ્લિકેશન દ્વારા દિલ્હીના ગૌરવ મંડલ નામના વ્યક્તિના સંપર્કમાં આવ્યા હતા. ગૌરવ મંડલને કંપનીના સલાહકાર તરીકે રાખવામાં આવ્યા હતા. તેણે સોનલબેનને લંડન ફેશન શોમાં તેમના કપડાં રજૂ કરવાનો વિચાર આપ્યો.

આ માટે ગૌરવ મંડલે સોનલબેનનો સંપર્ક દિલ્હીમાં મેડુશા ફેશન કંપની ચલાવતી સોનલ જિંદાલ સાથે કરાવ્યો. સોનલ જિંદાલે લંડન ફેશન વીકમાં ભાગ લેવા માટે કુલ ₹૩૨.૯૧ લાખની રકમ બે હપ્તામાં લીધી. ફેશન શો ૧૯ સપ્ટેમ્બરે યોજાવાનો હતો, પરંતુ સોનલ જિંદાલે ઈ-મેલ દ્વારા જાણ કરી કે લંડનની કંપનીએ તેમને શોમાં લઈ જવાની ના પાડી છે.

શંકા જતાં સોનલબેને લંડન ફેશન વીક કંપનીનો સીધો સંપર્ક કર્યો. ત્યારે તેમને જાણ થઈ કે મેડુશા કંપનીએ માત્ર તેમની ડિઝાઇન મોકલી હતી, પરંતુ શોમાં ભાગ લેવા માટેની કોઈ ફી જમા કરાવી નહોતી. આમ, તેમની સાથે મોટી છેતરપિંડી થઈ હોવાનું સ્પષ્ટ થયું. આ મામલે ઈન્ફોસિટી પોલીસે ગુનો નોંધીને આરોપીઓને પકડવાની કાર્યવાહી શરૂ કરી છે.