નાયબ મુખ્યમંત્રી હર્ષ સંઘવીના અધ્યક્ષસ્થાને ગાંધીનગર જિલ્લાના વિકાસ કાર્યો અંગે આયોજન મંડળની બેઠક યોજાઈ

ગાંધીનગર તા.૧૯ માર્ચ- નાયબ મુખ્યમંત્રી તથા ગાંધીનગર જિલ્લાના પ્રભારી મંત્રી શ્રી હર્ષ સંઘવીની અધ્યક્ષતામાં કલેકટર કચેરી ખાતે જિલ્લા આયોજન મંડળની બેઠક યોજાઇ હતી. જેમાં વર્ષ ૨૦૨૬-૨૭ દરમિયાન ગાંધીનગર જિલ્લામાં કરવામાં આવનાર વિકાસ કાર્યોનું આયોજન કરવામાં આવ્યું હતું. જિલ્લાના વિકાસ કાર્યોના આયોજન દરમિયાન નાયબ મુખ્યમંત્રીશ્રીએ સર્વે અધિકારીઓને જાહેર જનતાના એક પણ કામમાં વિલંબ ના થાય અને કોઈ પણ ટેકનિકલ કે નાની એરરના કારણે જનતાના હિતના કામો અટકાઈ નહીં તે માટે તાકીદ કરી હતી. આ સાથે તેમણે તમામ અધિકારીઓને સંકલન થકી જિલ્લાના વિકાસ કાર્યોને વધુ ઝડપી રીતે પૂર્ણ કરવા સહયોગ સાધવા જણાવ્યું હતું.
બેઠકમાં ૧૫% વિવેકાધીન તાલુકા કક્ષાની ૭૨૧ લાખ, ૧૫% ખાસ અંગભૂત હેઠળ ૭૯ લાખ તથા નગરપાલિકા કક્ષાની ૧૫૦ લાખ ગ્રાન્ટ અંતર્ગત કુલ ૯૫૦ લાખના કુલ ૩૭૧ કામમાંથી શિક્ષણ, આરોગ્ય, રોડ રસ્તા, પાણી પુરવઠા, ગંદા વસવાટોની સુધારણા, વીજળીકરણ, ભૂમિ સંરક્ષણ, પોષણ વગેરે વિભાગ અંતર્ગતના કુલ ૩૬૩ વિકાસ કાર્યો માટે ૯૩૪.૨૩ લાખની ગ્રાન્ટની ફાળવણી કરવામાં આવી હતી. આ તકે મેયર શ્રી મીરાબેન પટેલ, સાંસદ શ્રી હરિભાઈ પટેલ, ધારાસભ્ય સર્વશ્રીઓ શ્રી રીટાબેન પટેલ, શ્રી અલ્પેશ ઠાકોર, શ્રી લક્ષ્મણજી ઠાકોર, શ્રી જે.એસ.પટેલ, ઇન્ચાર્જ કલેક્ટર તથા કમિશનર શ્રી જે.એન.વાઘેલા, જિલ્લા વિકાસ અધિકારી શ્રી બી.જે.પટેલ, અધિક નિવાસી કલેકટર શ્રી નિશા શર્મા તથા અન્ય પદાધિકારીઓ,અધિકારીઓ ઉપસ્થિત રહ્યા હતા.